Ադրբեջանի նախագահը հրաժարվում է քննարկել Լեռնային Ղարաբաղի կարգավիճակի հարցը

Ղարաբաղյան հակամարտությունն ավարտված է, եւ չկա վերադարձ Ղարաբաղի կարգավիճակի վերաբերյալ բանավեճերին։ Այս մասին հայտարարել է Ադրբեջանի նախագահ Իլհամ Ալիեւը իսպանական «El Pais» պարբերականի հարցազրույցում, տեղեկացնում է «Ինտերֆաքս-Ազերբայջան»-ը։

«Ադրբեջանի դիրքորոշումը բաց է եւ պարզ։ Մենք ցանկանում ենք խաղաղություն, մենք պատերազմ չենք ցանկանում։ Մենք շահել ենք պատերազմը, մենք հաղթողներ ենք, եւ այս իրողությունը պետք է հաշվի առնել։ Ղարաբաղյան հակամարտությունն ավարտված է, չկա վերադարձ ոչ մի բանավեճի Ղարաբաղի կարգավիճակի կամ նման որեւէ բանի վերաբերյալ»,- ասել է Ալիեւը։ Նրա խոսքով՝ Ադրբեջանը հակամարտությունը լուծել է ռազմաքաղաքական միջոցներով։

Ալիեւը նշել է, որ ներկայում իրավիճակը Ղարաբաղում, որտեղ «ժամանակավորապես տեղակայված է ռուսական խաղաղապահ զորակազմը, ավելի կայուն է, քան Հայաստանի եւ Ադրբեջանի սահմանին»։ «Ցավոք, Հայաստանը չի հրաժարվել ռեւանշի փորձից։ Նրանց համար պարտությունը Ղարաբաղյան երկրորդ պատերազմում շատ ցավոտ էր»,- ընդգծել է նա։ Ադրբեջանի նախագահը նաեւ նշել է, որ Հայաստանը պետք է ձեռնպահ մնա ցանկացած թշնամական գործողությունից եւ տարածքային հավակնություններից, աշխատի խաղաղ պայմանագրի շուրջ։ «Մենք հարեւաններ ենք, եւ մեզանից ոչ ոք այլ մոլորակ չի թռչի։ Մենք պետք է սովորենք ապրել կողք կողքի եւ աստիճանաբար հող նախապատրաստենք հարաբերությունների կարգավորման, այդ թվում մարդկանց միջեւ շփումների համար։ Մենք բացահայտ հայտարարել ենք, որ պատրաստ ենք դրան։ Բայց առայժմ դրական ազդանշաններ (Հայաստանից - ԻՖ) չենք ստացել»,- ասել է Ալիեւը։

Այնինչ, մայիսի 12-ից ադրբեջանցի զինվորականները ներխուժել են Հայաստանի ինքնիշխան տարածք եւ հրաժարվում են հեռանալ։ Ադրբեջանը պարբերաբար տարբեր սադրանքներ է գործադրում, գնդակոծում է խաղաղ հայկական գյուղերն ու մարտական դիրքերը։