Հունաստանի իշխանություններն ընդունել են Թուրքիայից փախած 17 թուրքի

Թուրքիայի 17 քաղաքացի Հունաստան մուտք գործելու թույլտվություն է ստացել եւ դիմում ներկայացրել ապաստան ստանալու համար։
Հունաստանի ոստիկանությունը հայտնել է, որ ութ տղամարդ, չորս կին եւ հինգ երեխա ժամանակավորապես ձերբակալվել են սահմանի մոտ՝ պաշտոնական ճանաչման համար:

Խմբի անդամները համացանցում տեսանյութ են տեղադրել՝ անգլերենով օգնություն խնդրելով։ Տեսանյութում նրանք պնդում էին, որ Թուրքիայում հետապնդումների են ենթարկվել, սակայն մեղադրանքի մանրամասները չեն ներկայացրել։

Թուրքական իշխանությունները ճնշում են գործադրել ԱՄՆ-ում բնակվող իսլամական քարոզիչ Ֆեթուլլահ Գյուլենի ենթադրյալ կողմնակիցների նկատմամբ 2016-ի անհաջող հեղաշրջումից հետո: Անկարան Գյուլենին մեղադրում է իշխանությունը զավթելու փորձ կազմակերպելու մեջ, հայտնում է AP-ն։

Մոտ 4900 մարդ, ովքեր ենթադրաբար կապված են Գյուլենի ցանցի հետ, դրանից հետո դատապարտվել են ազատազրկման, այդ թվում մոտ 3000-ը՝ ցմահ բանտարկության։ Պետական ​​ծառայությունից ազատվել է ավելի քան 130 հազար մարդ, այդ թվում՝ ավելի քան 20 հազար զինվորական։