Փորձագետ․ Անկարայի եւ Բաքվի ծրագրերը անհանգստություն են առաջացնում ոչ միայն Իրանի մոտ

Անկարայի եւ Բաքվի ծրագրերը անհանգստություն են առաջացնում ոչ միայն Իրանի մոտ։ Այս մասին NEWS.am-ի հետ զրույցում ասաց ռուսաստանցի փորձագետ, իրանագետ Կարինե Գեւորգյանը։

«Կարող եմ ասել, որ Հնդկաստանի ղեկավարությունը, որը շահագրգռված է մակրոտարածաշրջանում հաղորդակցությունների դիվերսիֆիկացման մեջ, նույնպես շատ մտահոգված է այս ամբողջ իրավիճակով։ Այն հեռանկարը, որ տարածաշրջանում բոլոր հաղորդակցությունները կվերահսկվեն Թուրքիայի կողմից, մտահոգություն է առաջացնում տարածաշրջանի որոշ երկրներում՝ Անկարայի հակառակորդների կամ մրցակիցների մոտ։ Այլ հարց է, որ Հայաստանի ղեկավարությունը չի արձագանքում նաեւ իրանցիների կողմից հնչեցրած այս մտահոգությանը»,-ընդգծեց նա։

Փորձագետը հիշեցրեց, որ իրանա-ադրբեջանական հարաբերությունների վերջին սրման ֆոնին Թուրքիան փակել է իր տարածքով իրանական տարանցման ուղիները։ «Թուրքիայի եւ Իրանի հարաբերությունները սրվում են։ Առայժմ գործը մինչեւ դեսպանների հետկանչ չի հասել։ Իրանը կտրականապես դեմ է Սյունիքով արտատարածքային հաղորդակցությանը, ուստի Թեհրանը հայտարարեց, որ իր համար Հայաստանի տարածքային ամբողջականությունը ռազմավարական շահերի հարց է։ Այս ամբողջ իրավիճակը ձեռնտու չէ իրանցիներին, եւ նրանք բացահայտ խոսում են այդ մասին։ Թեհրանը վախենում է եւ չի կարող ընդունել մի իրողություն, որում հենց Թուրքիան է վերահսկելու տվյալ մակրոտարածաշրջանի բոլոր հաղորդակցությունները»,-ասաց Գեւորգյանը։

Շուտով Վիեննայում տեղի կունենա Իրանի միջուկային ծրագրի շուրջ համաձայնագրի ստորագրումը եւ այդ ֆոնին, փորձագետի գնահատմամբ, Սաուդյան Արաբիայի եւ ԱՄԷ-ի հետ Իրանի հարաբերությունների մերձեցում է նկատվում։

«Դա շատ կարեւոր է այն տեսանկյունից, որ երկու արաբական երկրները մրցակից են Թուրքիային։ Երեք երկրների պոտենցիալ ընդհանուր շահերը կարող են կապված լինել նաեւ Հարավային Կովկասի իրավիճակի հետ»,-եզրափակեց նա։

Հիշեցնենք, որ նոյեմբերի 11-ից ադրբեջանական կողմը Գորիս-Կապան մայրուղում մաքսակետեր է տեղադրել։