Արցախի 80 տոկոսի հետ 198 տոննա չմշակված ոսկի են հանձնել Ադրբեջանին՝ խոստման դիմաց. Հրաչ Ջաբրայան

«Հայաստանում ապագա չկա, և ինչպես Փաշինյանը հայտարարեց, որ Արցախը Հայաստան է, և վերջ, բայց Արցախի մեծ մասն առանց կրակոցի հանձնվեց Ադրբեջանին. այսինքն` ստեց, այնպես էլ ապագա կա ասելով են ստում. կրկնում եմ՝ ապագա չկա, ու դրա համար Հայաստանից մարդիկ արտագաղթում են»։

168 TV-ի «Ռեվյու» հաղորդաշարի եթերում պնդեց Կանադայից Հայաստան վերադարձած ու այստեղ մշտական բնակություն հաստատած գործարար Հրաչ Ջաբրայանն ու շարունակեց միտքը՝ պարզաբանելով.

«Ես շատ փող եմ կորցրել այս պատերազմից հետո Արցախում, իմ ընկերներին եմ կորցրել, բայց իմ հայրենասիրությունը չեմ կորցրել, իսկ հայրենասիրությունը խոսքով չի լինում, գործով է լինում, ուստի, եթե հայրենիքդ մեծ ներդրումների կարիք ունի, դա պետք է անել։ Իհարկե, շատ դժվար է մարդկանց համոզել, որ գան այստեղ ներդրումներ կատարեն, այդ քայլին գնալուց դրսի ներդրողները հրաժարվում են, ու պատճառը միայն պատերազմը չէ։ Պատճառներից մեկը Ամուլսարի հանքն է ու դրա շուրջ ստեղծված վիճակը. թեև գիտեմ, որ առաջիկայում հանքն աշխատելու է։ Հայաստանում ներդրում անելը դարձել է խնդրահարույց նաև այն պատճառով, որ թշնամին արդեն Հայաստանում է։ Գիտեք, եթե մենք նախկինում 100 միլիոն դոլարի ներդրում էինք անում, սահմանների անառիկության մասին չէինք մտածում, հիմա լրիվ այլ իրավիճակ է։ Օրերս Կանադայից մեր ընկերության տնօրենների խորհրդի նախագահն ինձ ասաց, որ եթե ես պետք է Հայաստանում ներդրումային ծրագիր իրականացնեմ, ապա դրանում անպայման պետք է ներառեմ զինված պահակախումբ ունենալու անհրաժեշտությունը»,- ասաց գործարարը՝ նշելով, որ թեև իր դեմ Հայաստանում հարուցվել է քրեական գործ ենթադրյալ բռնություն գործադրելու հատկանիշներով, և դատարանն արգելել է նրան լքել Հայաստանի տարածքը, բարեբախտաբար, երեկ կարողացել է իրավապահներից ետ ստանալ իր կանադական անձնագիրը և փորձելու է թույլտվություն ստանալ մեկնելու Կանադա՝ Հայաստանում պլանավորված ներդրումային ծրագրերի հետ կապված խնդիրները կարգավորելու։

«Բայց աներկբա է՝ մինչև իշխանափոխություն չլինի, Հայաստանում մեծածավալ ներդրումային ծրագրեր չեն իրականացվի։ Այս իշխանությունը պետք է հեռանա, այո՛, վերընտրվել է, բայց պետք է հիշել, որ տարիներ առաջ էլ Հիտլերը հաղթեց մոտ 7 միլիոն ձայնով, բայց մի քանի տարի անց ինքնասպան եղավ. այո՛, դավաճաններն ինքնասպան են լինում, և ես մի քանի անգամ ասել եմ, հիմա ևս կկրկնեմ՝ այս երկրի վարչապետի աթոռը զբաղեցնողը դավաճան է, իսկ դավաճանների վերջը շատ հստակ է, այնպես որ, մինչև քաղաքական հանգուցալուծումը չլինի, չլինի իշխանափոխություն՝ մեծ ներդրումներ չեն գա Հայաստան։ Ներդրումներ չեն գա նաև Արցախ, որովհետև հիմա գործում է մի իշխանություն, որը եկել էր Հայաստանն ու Արցախը ներսից քանդելու համար։ Ասվածի ապացույցն այն է, որ, օրինակ, եկան ու փակեցին Սփյուռքի նախարարությունը՝ քանդելով սփյուռքի հետ կապերը, բերեցին Զարեհ Սինանյանին, որը հայտարարում է, թե սերտ կապեր ունենք սփյուռքի հետ, մինչդեռ ամենաուժեղ համայնքները՝ Լիբանան, Ֆրանսիա, Սիրիա և այլն, նրանից դժգոհ են, հանդիպումներ չեն եղել։ Այսօր սփյուռքահայերի հետ եմ խոսում, նրանք հիասթափված են Հայաստանից, մինչդեռ պետք էր նրանց սիրաշահել։ Իսկ գիտե՞ք, թե ինչու չեն անում, չեն անում, որովհետև ծրագիր ունեն՝ Հայաստանը քանդել ներսից, ու դրա համար էլ Հայաստանից անջատեցին սփյուռքը»,- ասաց Ջաբրայանը։

Ըստ նրա՝ պատերազմից հետո առանց կրակոցի Ադրբեջանին հանձնված հողերի հետ, գործող իշխանությունը Ադրբեջանին է հանձնել նաև հսկայական բնական ռեսուրսներ։

«Այս իշխանությունը Արցախի 80 տոկոսը տվեց թշնամուն, Արցախի հետ Ադրբեջանին են հանձնել 198 տոննա չմշակված ոսկի, որի արժեքը շուկայում կազմում է 7 միլիարդ դոլար, և 20-30 միլիարդ դոլար արժեցող չմշակված նավթի պաշար։ Այդ ամենն Ադրբեջանին են հանձնել խոստման դիմաց. առաջին խոստումը եկավ՝ Եվրամիության 2.6 միլիարդ դոլարի վարկն է, հիմա նաև սփյուռքի ներդրումները փոխարինում են Թուրքիայի և Ադրբեջանի ներդրումներով. այդ երկու պետությունները կգերազանցեն սփյուռքի ներդրումները Հայաստանում, իսկ այդ ժամանակ Հայաստանը դառնալու է Էրմենիստան, իսկ իրական հայերն ապրելու են սփյուռքում»,- ասաց Հրաչ Ջաբրայանը։

Հարցազրույցի մանրամասները՝ տեսանյութում