Դիդյե Դեշամը` Ֆրանսիայի հավաքականի պարտության ու իր հրաժարականի մասին

Ֆուտբոլի աշխարհի գործող չեմպիոն Ֆրանսիայի հավաքականի գլխավոր մարզիչ Դիդյե Դեշամը մեկնաբանել է Եվրո-2020-ի 1/8 եզրափակիչում շվեյցարացիներից կրած պարտությունը և նշել, որ չի պատրաստվում հրաժարական տալ:

«Արեցինք այն ամենը, ինչ հարկավոր էր հաշիվը 3:1 դարձնելու համար, իսկ հետո զգացվեց թուլություն, ինչն անսովոր է մեզ համար: Միշտ ցավալի է պարտվել հետխաղյա 11 մետրանոցներով: Կիլիան Մբապեն հուսահատված է բոլորի պես: Սակայն չենք կարող մեղադրել որևէ մեկին: Նա ինքն ընտրեց 5-րդ 11 մետրանոցն իրացնելու պատասխանատվությունը:

Ինչ վերաբերում է հրաժարական տալուն, ապա այդ հարցը նույնիսկ դրված չէ իմ առջև: Մեր թիմը միասնական է: Այո, ես եմ պատասխանատու արդյունքի համար, սակայն թիմն աջակցում է ինձ: Իսկ ես միշտ աջակցում եմ իմ խաղացողներին: Հիմա պետք է ամեն բան վերլուծել, այլ ոչ թե տեղ տալ էմոցիաներին»,- Դեշամի խոսքը մեջբերում է BeIN Sports-ը:

Հիշեցնենք, որ Ռումինիայի մայրաքաղաք Բուխարեստում անցկացված խաղում ֆրանսիացիները պարտվել էին հետխաղյա 11 մետրանոցներով: Հանդիպման հիմնական ու լրացուցիչ ժամանակն ավարտվել էր 3:3: հաշվով:

Քառորդ եզրափակիչում Շվեյցարիայի հավաքականը հուլիսի 2-ին Սանկտ Պետերբուրգում կմրցի իսպանացիների հետ: