Ջանլուիջի Բուֆոնի հերթական ռեկորդը

Թուրինի «Յուվենտուսի» դարպասապահ Ջանլուիջի Բուֆոնը ֆուտբոլի Իտալիայի գավաթակիր դառնալու արդյունքում սահմանել է ռեկորդ:

Իտալիայի հավաքականի նախկին դարպասապահը 6-րդ անգամ նվաճեց Իտալիայի գավաթը, ինչը ռեկորդային ցուցանիշ է: 1999-ին նա Իտալիայի գավաթակիր էր դարձել «Պարմայի» հետ, իսկ 2015, 2016, 2017, 2018 ու 2021 թվականներին՝ «Յուվենտուսի», հայտնում է Opta-ն:

Բացի այդ, Բուֆոնը Իտալիայի գավաթում հաղթել է 3 տասնամյակներում:

Հիշեցնենք, որ օրեր առաջ Բուֆոնը հայտնել էր, որ այս մրցաշրջանի վերջում կհեռանա «Յուվենտուսից»: 43-ամյա իտալացին «Յուվենտուսում» խաղացել է 2001-2018-ը, ինչից հետո տեղափոխվել էր ֆրանսիական ՊՍԺ: 2019-ին նա վերադարձավ իտալական ակումբ: Նրա գործող պայմանագիրը նախատեսված է մինչև այս մրցաշրջանի ավարտը:

Ավելի վաղ Ջանլուիջի Բուֆոնը հայտարարել էր, որ մտադիր է կարիերան ավարտել 2023 թվականի ամառվանից ոչ ուշ: