Մարկո Ռոյսը բացատրել է, թե ինչու չի մասնակցի Եվրո-2020-ին

Դորտմունդի «Բորուսիայի» գերմանացի կիսապաշտպան Մարկո Ռոյսը պատմել է, թե ինչու է որոշել չմասնակցել Եվրո-2020-ին:

«Բարդ, բայց հաջող մրցաշրջանից հետո հավաքականի մարզիչի հետ որոշեցինք, որ չեմ մեկնի Եվրոպայի առաջնությանը: Դա շատ բարդ որոշում էր ինձ համար, քանի որ միշտ լի եմ հպարտությամբ, երբ ունեմ ազգային թիմում խաղալու հնարավորություն: Սակայն շատ լարված տարվանից հետո որոշեցի հանգստանալու հնարավորություն տալ օրգանիզմիս: Կօգտվեմ դադարից, որպեսզի լավատեսությամբ սկսեմ նոր մրցաշրջանը: Մեր մարզիչին ու թիմին լավագույնն եմ մաղթում Եվրոպայի առաջնությունում»,- Ինստագրամում գրել է 31-ամյա ֆուտբոլիստը:

Բունդեսլիգայի այս մրցաշրջանում Ռոյսը մասնակցել է 31 հանդիպման, դարձել 7 գոլի ու 6 գոլային փոխանցման հեղինակ: Նա 2011 թվականից է հանդես գալիս Գերմանիայի հավաքականում, որի կազմում անցկացրել է 44 հանդիպում և դարձել 13 գոլի հեղինակ: