Իսլանդիայի հավաքականի առաջատարը չի մասնակցի Հայաստանի դեմ խաղին

Ֆուտբոլի Հայաստանի ազգային հավաքականի մրցակիցներից Իսլանդիայի հավաքականի առաջատար Գիլֆի Սիգուրդոնը չի մասնակցի 2022թ. աշխարհի առաջնության ընտրական փուլի մեկնարկային 3 տուրերի խաղերին, հայտնում է երկրի ֆուտբոլի ֆեդերացիայի մամուլի ծառայությունը:

Անգլիական «Էվերտոնի» կիսապաշտպանն ազգային թիմին չի միանա ընտանեկան պատճառներով: Սիգուրդոնի կինը երեխայի է սպասում:

Անգլիայի ընթացիկ առաջնությունում 31-ամյա Սիգուրդոնը մասնակցել է 26 խաղի և դարձել 4-ական գոլի ու գոլային փոխանցման հեղինակ: Իսլանդիայի հավաքականի կազմում նա անցկացրել է 78 հանդիպում և խփել 25 գոլ:

Հիշեցնենք, որ Հայաստանի հավաքականն ընտրական փուլում պայքարը կսկսի մարտի 25-ին՝ Վադուցի «Ռեյնպարկ» ստադիոնում հյուրընկալվելով Լիխտենշտեյնին: Մարտի 28-ին և 31-ին Խոակին Կապառոսի գլխավորած թիմը Երևանի «Հանրապետական» ստադիոնում կընդունի Իսլանդիայի և Ռումինիայի հավաքականներին: