Իբրահիմովիչ․ Միայն մեկն է ինձնից լավ ֆուտբոլիստ եղել

Իտալական «Միլանի» 39-ամյա շվեդ հարձակվող Զլատան Իբրահիմովիչը կարծում է, որ պատմության մեջ միայն մեկ ֆուտբոլիստ է իրենից լավը եղել։

«Ռոնալդոն բացառիկ ֆուտբոլիստ էր, իմ կուռքն էր, բայց բոլոր ժամանակների լավագույնը Մարադոնան է։ Նա միակն է, որն ինձնից լավ ֆուտբոլիստ է եղել։

Հաղթանակներն ինձ համար թմրանյուտ են։ Բարդ է բացատրել, բայց ես ցանկանում եմ հաղթել ամեն գնով։ Նույնիսկ, մարզումների ժամանակ ես միայն հաղթելու համար եմ դուրս գալիս խաղադաշտ։ Իտալիայի չեմպիոնի տիտղոսն ինձ համար կլինի ամենահրաշալի իրադարձությունը»,- Իբրահիմովիչի խոսքը մեջբերում է Gazzetta Dello Sport-ը։

Հիշեցնենք, որ Մարադոնան մահացել է նոյեմբերի 25-ին 60 տարեկանում։

Վնասվածքի պատճառով Իբրահիմովիչը դեռ չի մասնակցում «Միլանի» ընդհանուր խմբի մարզումներին։ Ընթացիկ մրցաշրջանում նա «Միլանի» հետ մասնակցել է 10 հանդիպման, խփել 11 գոլ, կատարել 2 գոլային փոխանցում։

«Միլանը» 34 միավորով առաջատարն է եւ 1 միավոր առաջ է երկրորդ տեղում ընթացող «Ինտերից»։