Նիկոլից դիցաբանական կերպար կերտող Ալեքսեյ Ռոմանովն այսօր ասում է՝ «հայերը զենքով գրավել էին Արցախը ու ներողություն չէին խնդրում դրա համար»

Հասարակական-քաղաքական գործիչ Սամվել Ֆարմանյանը ֆեյսբուքյան իր էջում «Նիկոլը, իր պրոդյուսեր Ալեքսեյ Ռոմանովն ու ծվատված Արցախը» վերտառությամբ գրառում է արել: Գրառման մեջ Ֆարմանյանը անդրադարձել Նիկոլ Փաշինյանի հետ փողոցներում քայլող ու նրա մասնակցությամբ տեսանյութեր տարածող Ալեքսեյ Ռոմանովի՝ 2018-2019 թվականների տարածած հայտարարություններին և այսօրվա գրառումներին, որտեղ վերջինս նշել է, թե «հայերը 1990-ականների սկզբին զենքով գրավել էին Արցախը քիչ է, մի հատ էլ ներողություն չէին խնդրում դրա համար ու դա չէին համարում հանցագործություն»:

«Հիշու՞մ եք այս մարդուն՝ Ալեքսեյ Ռոմանով, ռուս բլոգեր, ով չգիտես որտեղից ու ինչպես հանկարծ հայտնվեց 2018 թ. հեղափոխական իրադարձությունների կենտրոնում: Նիկոլի հետ փողոցներում քայլում էր, նրանից հարցազրույցներ էր վերցնում, հետո արդեն վարչապետ Փաշինյանի հետ մարզասրահ էր այցելում, նրա աշխատասենյակում հյուրընկալվում ու իր մեծ տարածում գտնող տեսանյութերով փորձում Նիկոլից կերտել Նելսոն Մանդելայից ու Մահաթմա Գանդիից պատվաստված մի դիցաբանական կերպար, մի յուրահատուկ մանդելագանդի, ով եկել էր փրկելու «բազմաչարչար» հայ ժողովրդին...»,- գրել է Ֆարմանյանը և կցել վերոնշյալ տեսանյութերից մի քանիսը (1, 2, 3)։

«Դե, իսկ էդ ամենը քանի որ արվում էր ռուսերենով, Հայաստանում շատերը դեմքի լուրջ արտահայտությամբ նստած մտածում էին՝ ըհը, ուրեմն ռուսը Նիկոլի հետ է, վերջ: Իսկ ահա Նիկոլի նման թերուսը, ով ամբողջ կյանքն զբաղված է եղել հենց նման միաքայլ ու միաբջիջ շուստրիություններով ու անառակություններով, ձեռքերն էր շփում ստացվող հերթական խաբկանքից ու հայտնի խոշոր սեփականատերերի միջոցներից երևի առատորեն վարձրատրում իր պրոդյուսերը դարձած ռուս բլոգեր Ռոմանովին: Ու հիմա՞…

Նույն Ալեքսեյ Ռոմանովն է: Բայց ոչ թե «2018-2019» եթերաշրջանի Ռոմանովը, ում հեղափոխական հայ ժողովուրդը սիրում էր ու իր գլխին դնում, այլ էսօրվանը՝ «աղետաբեր 2020»-ինը, որին արդեն սիրում են հաղթանակից գլխապտույտի մեջ հայտնված ադրբեջանցիները: Կարդացեք՝ ինչ է գրում: Կարդացե՛ք ու հասկացե՛ք, թե ում հետ էր «աղջիկ ժամանակները» ընկերություն անում մեր տնաբույծ մանդելագանդին ու գլխի ընկեք, թե ինչը կարող էր նրանց միավորել էյֆորիկ «2018-2019» եթերաշրջանում:

Նիկոլի հեղափոխական ռուսախոս պրոդյուսերն ասում է, որ հայերը 1990-ականների սկզբին զենքով գրավել էին Արցախը քիչ է, մի հատ էլ ներողություն չէին խնդրում դրա համար ու դա չէին համարում հանցագործություն: Սա էլ քիչ է, ըստ Ռոմանովի, մի բան էլ հայերն էդ ամենի համար անգամ մեղքի տարրական զգացում չունեին, իսկ Արցախը հանդգնում էին իրենց Հայրենիքը համարել: Բա՞:

Ու էս ամենի մասին Նիկոլի պրոդյուսերը բարձրաձայնում է հիմա, երբ գնացքն արդեն գնացել է՝ իր երեկվա տեսանյութերի հերոս մանդելագանդիի ձեռքով Արցախն արդեն գլխատված է: Բա հո էն հեղափոխական ժամանակներում բացեիբաց նման բան չէ՞ր ասի, որ հայ ժողովուրդը հանկարծ ինքն իրեն հարց տար, թե, էս ի՞նչ խաբար է կամ սկսեր իր մանդելագանդիին հարցեր տալ:

Ինձ բնավ չի հետաքրքրում, թե Ռոմանովը ինչ է հասկանում Հայրենիք ասելով կամ ինչ է գրում Չեչնիայի ու Ղրիմի մասին, ու թե դրանցից որն է համարում ռուս ժողովրդի հայրենիք ու որը՝ ոչ, ու թե ինչու է հենց իր հայրենիք Ռուսաստանը բնութագրում իբրև ագրեսիայի, իմպերիալիզմի ու երեսպաշտության օրինակ: Հետևություններ թող անեն Ռուսաստանի իշխանությունները, եթե դրա անհրաժեշտությունը տեսնեն:

Ինձ հետաքրքրում է լրիվ այլ բան. գոնե հիմա մարդիկ հասկանու՞մ են, թե ինչու ու ինչ նպատակով էին ռոմանովները Նիկոլից ժամանակին փրկիչ ու մանդելագանդի կերտում, իսկ այսօր արդեն ուրանում ու ըստ էության հայհոյում նրան ու հայ ժողովրդին՝ սիրաշահելով ադրբեջանցիներին ու պղծելով Արցախը: Հա մեկ էլ, տեսախցիկների կադրից դուրս տեսնես էն ժամանա՞կ էլ Ռոմանովն ու Նիկոլը լիակատար փոխըմբռնում ունեին Արցախի հարցում»,- գրել է Սամվել Ֆարմանյանը: