Վերելակների նորոգմամբ զբաղվող ընկերության աշխատակիցները ակցիա են անում. պահանջում են իրենց աշխատավարձը

Երևանի Նոր Նորք վարչական շրջանի Թևոսյան փողոցում գործող «Ռաֆայել Գրիգ» ՍՊԸ-ի վարչական շենքի դիմաց այսօր՝ սեպտեմբերի 1-ին հավաքվել են 100-ից ավելի քաղաքացիներ, ովքեր արդարացիորեն պահանջում են իրենց կատարած աշխատանքի դիմաց գումարները։

Shamshyan.com-ի հաղորդմամբ, ակցիայի մասնակիցներն ասում էին․ «Մոտ 2 ամիս է՝ մայրաքաղաքում սկսել ենք իրականացնել վերելակների կապիտալ վերանորոգում և մեծ մասն էլ հին, դարն ապրած վերելակները փոխել ենք նորով։ Անգամ՝ մեր հաշվին աշխատել ենք շաբաթ-կիրակի օրերին, հաշվի առնելով մեր ժողովրդի վիճակը, որ ինչքան շուտ բնակիչները ունենան նոր վերելակներ, այնքան լավ։ Նմանատիպ աշխատանքներ ենք կատարել մայրաքաղաքի Շենգավիթ, Էրեբունի, Ավան և Նոր Նորք, Մալաթիա-Սեբաստիա վարչական շրջաններում։ Իսկ հիմա 200-ից ավելի աշխատակիցներով հայտնվել ենք կոտրած տաշտակի առաջ։

Դիմում ենք Ռաֆայել Գրիգորյանին մեր հալալ քրտինքով վաստակած աշխատավարձները ստանալու համար, նա մեզ ուղղորդում է Երևանի քաղաքապետարան։ Պարետ Տիգրան Ավինյանը հորդորում է, որ համավարակի այս օրերին պահպանենք սանիտարահիգիենիկ պայմանները։ Եթե աշխատավարձները չենք ստացել, ո՞նց ենք կոմունալները մուծելու»:

Ակցիայի մասնակիցները պատրաստվում են գնալ Երևանի քաղաքապետարան, վերջնական պարզեն՝ քաղաքապետարա՞նն է ստում, թե՞ ՍՊԸ-ի տնօրինությունը։