Թե՛ նախկին իշխանությունների, թե՛ ներկայիս իշխանությունների օրոք իմ նկատմամբ ճնշումներ չեն եղել և չեն էլ կարող լինել

Երբևէ, թե՛ նախկին իշխանությունների, թե՛ ներկայիս իշխանությունների օրոք իմ նկատմամբ ճնշումներ չեն եղել և չեն էլ կարող լինել: Այս մասին լրագրողների հետ ճեպազրույցում ասաց դատավոր Մխիթար Պապոյանը՝ անդրադառնալով հարցին, թե վերջին երկու տարում քաղաքական իշխանության կողմից իր վարույթում գտնվող գործերի միջամտության փորձ կամ դատավորի նկատմամբ ճնշում զգացե՞լ է, կարող է համեմատել նախկինի հետ:

«Իր նկատմամբ ճնշումները հենց ինքը՝ դատավորն է թույլ տալիս, ճնշումները պայմանավորված են դատավորի վարքագծով: Եթե դատավորն իրեն կարողանում է այնպես դրսևորել, որ իրեն նման ճնշումների չենթարկեն, որևէ մեկը չի ենթարկի: Ինձ համար ոչինչ չի փոխվել, ես ինչպես աշխատել եմ, նույն ձևով շարունակում եմ աշխատել: Երբ ինձ մոտ ինչ-որ բան կփոխվի, դա կլինի ինձ համար վերջին աշխատանքային օր»,-ասաց նա:

Դիտարկմանը, թե Կոռուպցիայի կանխարգելման հանձնաժողովը ստուգում է դատավորների հայտարարագրերը, արդյո՞ք նպատակը հասկանալն է, թե դատավորները ինչ-որ բան թացքցրե՞լ են հայտարարագրից կամ ապօրինի հարստացել են, և հարցին՝ ինքը նման մտավախությւոն ունի՞, ինչ-որ բան թաքցրել է, Պապոյանը պատասխանեց. «Չունեմ ընդհանրապես նման մտավախություն, որքան անհրաժեշտ է, այդքան կարող են ստուգել: Եթե հարցեր կան, որոնք իրենց համար պարզ չեն, կարող եմ նաև պարզաբանել»:

Դիտարկմանը, թե պնդումներ կան, որ դատավորների հայտարարագրերի ստուգումը կարող է մահակ դառնալ դատավորների գլխին և գործիք է՝ նրանցից ազատվելու համար, դատավորն արձագանքեց, թե նոր չէ, որ դատավորները յուրաքանչյուր տարի հայտարարագիր են լրացնում:

«Ես 2009 թվականից դատավոր եմ, այդ ժամանակվանից ինքս լրացրել եմ հայտարարագիր: Ցանկացած ժամանակ էլ, եթե այդ փաստաթղթում կան անճշտություններ, դրանք կարող են դատավորի հետ կապված խնդիրներ առաջացնել, այսինքն՝ այն անձի, որ հայտարարագիրը սխալ է լրացրել: Այսինքն՝ այնպես չէ, որ դա որևէ մեկի ցանկությունն է՝ ռեալիզացնել, թե ոչ, ցանկացած իրավական պետությունում, եթե կան նման խնդիրներ, իհարկե, պետք է ռեալիզացվեն»,-ասաց նա:

Դիտարկմանը, թե մամուլի հրապարակումների համաձայն՝ դատավորների ընդհանուր ժողովի՝ ՍԴ դատավորի թեկնածուն Վճռաբեկ դատարանի նախագահ Երվանդ Խունդկարյանն է, և հարցին՝ ինչպե՞ս է վերաբերվում նրա թեկնածությանը, Պապոյանը պատասխանեց, թե այդ թեկնածուի մասին ինքը ևս մամուլից է տեղեկացել: «Գաղտնի քվեարկություն է, ես չեմ ցանկանա մինչ քվերակությունն իմ դիրքորոշումն արտահայտել»,-ասաց նա:

Հիշեցնենք՝ Կարեն Դեմիրճյանի անվան մարզահամերգային համալիրում ընթանում է ՀՀ դատավորների հերթական ընդհանուր ժողովը, որը նախատեսված էր անցկացնել մարտի 13-ին, սակայն համավարակով պայմանավորված հետաձգվել էր։

Ընդհանուր ժողովի օրակարգում դատավորները պետք է կատարեն Սահմանադրական դատարանի դատավորի թեկնածուի, Բարձրագույն դատական խորհրդի դատավոր անդամի, ինչպես նաև դատավորների գործունեության գնահատման և Ուսումնական հարցերի հանձնաժողովների դատավոր չհանդիսացող անդամների թեկնածուների ընտրություն։

ՍԴ դատավորի թափուր տեղի համար իրենց թեկնածությունն են առաջադրել Վճռաբեկ դատարանի նախագահ Երվանդ Խունդկարյանը և Տավուշի մարզի առաջին ատյանի ընդհանուր իրավասության դատարանի նախագահ Արման Կյուրեխյանը։ Բարձրագույն դատական խորհրդի դատավոր անդամի, դատավորների գործունեության գնահատման հանձնաժողովի անդամի և այլ ընտրություններ ևս օրակարգում կան։