ՊԵԿ–ի պարգևավճարները 5 անգամ շատ են եղել բյուջեի եկամտային մասի մուտքերից

Տնտեսագետ Թաթուլ Մանասերյանը Sputnik Արմենիայի եթերում անդրադարձել է ՀՀ կենտրոնական բանկի նախագահ Արթուր Ջավադյանի ներկայացրած տեղեկությանը, ըստ որի` 2019թ.–ի պետբյուջեի պակասուրդը նախորդ տարվա համեմատ նվազել է 41,4 մլրդ դրամով։

Տնտեսագետ Թաթուլ Մանասերյանի փոխանցմամբ` դա հիմնականում պայմանավորված է 2019թ.–ին գրանցված տնտեսական աճով, որում էական դերակատարություն են ունեցել խաղադրույքների բիզնեսը և մեքենաների ներկրումից ստացված հարկերը, սակայն պետք է չմոռանալ, որ բազմաթիվ օլիգարխներից կամ նախորդ ռեժիմի ներկայացուցիչներից ներկայիս վարչակարգը կարողացել էր մեծ գումարներ հետ բերել, որոնք նույնպես արտացոլված են պետբյուջեում։

«Ես 2020թ.–ի պետբյուջեի կատարողականի առումով տեսնում եմ շատ լուրջ ռիսկեր, պակասուրդը բնականաբար աճելու է, ինչի արդյունքում տնտեսական աճը կդանդաղի և կգրանցվի տնտեսական անկում, ինչն արդեն իսկ մի շարք ոլորտներում ակնհայտ է։ Գյուղատնտեսությունից անկումը նախորդ տարվանից ենք ժառանգել, նման անկում կլինի զբոսաշրջության ոլորտում և վերամշակող արտադրությունում»,– նշում է տնտեսագետը։

Մանասերյանի համոզմամբ` դիլետանտներով հնարավոր չէ պետբյուջեի եկամտային մասը լցնել։ Ըստ նրա` այժմ փորձում են գույքահարկի միջոցով, ապօրինի գույքի բռնագանձման միջոցով և նմանատիպ օրենքներ մշակելով հարցերին տալ լուծում, սակայն տնտեսագետը վկայակոչում է մեկ փաստ, ըստ որի` ՊԵԿ–ում և հատկապես մաքսային մարմիններում պարգևավճարները գրեթե հինգ անգամ ավելի շատ են առաջին չորս ամիսների տվյալներով, քան այն մուտքերը, որ կարողացել են բերել պետբյուջեի եկամտային մաս։

«Ներկայիս կառավարությունը և հատկապես տնտեսական բլոկը բացարձակապես չի հասկանում, թե ինչով է զբաղված, և ինձ մոտ այն տպավորությունն է, որ ձախողել են բառացիորեն ամեն ինչ, օրինակ` գազի բանակցությունները։ Ակներև է, որ չկա տնտեսական հստակ քաղաքականություն, աշխատանքի և սոցիալական ոլորտի նախարարությունը դարձել է սոցապ նախարարություն` նպաստների կիսատ–պռատ ծրագրերով, իսկ աշխատատեղերի և զբաղվածության առումով կառավարության մոտ որևէ մտահոգություն չեմ տեսնում։ Նման իրավիճակում բնական է, որ դիմելու են արտաքին փոխառությունների, որոնք ծանրանալու են սերունդների վրա»,– նշում է տնտեսագետը։

Տնտեսագետի կարծիքով` պետբյուջեի եկամուտները համալրելու համար անհրաժեշտ է ստեղծել նոր արժեքներ։

Ըստ նրա` ներկայիս կառավարությունը նոր արժեք ստեղծող չէ, նա միայն մարդկանց բռնող, ասֆալտին փռող, պատերին ծեփող մարմին է, պատժելն ու պատասխանատվության ենթարկելն, առհասարակ, հատուկ տաղանդ չի պահանջում, բայց ամեն մարդ չէ, որ կկարողանա նոր արժեք ստեղծել, հետևաբար, մեզ շինարարներ ու կառուցողներ են պետք։