ԱԺ-ում Արման Թաթոյանի նկատմամբ թիրախավորումն անթաքույց էր, հերթական կայացած ինստիտուտն են փորձում արժեզրկել. Լիլիթ Գալստյան
ԱԺ-ում ՄԻՊ Արման Թաթոյանի զեկույցի քննարկման ընթացքում մի շարք պատգամավորների ցուցաբերած վարքագծի մասին Tert.am-ը զրուցել է ՀՅԴ ԳՄ անդամ Լիլիթ Գալստյանը հետ: Նա կարծում է, որ այսօր Արման Թաթոյանի նկատմամբ թիրախավորումն ու ամբարտավան տոնայնությունն անթաքույց էր: Չեն հասկանում, գուցե չգիտեն, գուցե պատվեր են կատարում՝ թիրախավորել, արժեզրկել և քայքայել հերթական կայացած ինստիտուտը: Սա արդեն հստակ վարքագիծ է և անհերքելի ձեռագիր:
- Տիկին Գալստյան, իշխանության ներկայացուցիչները ՄԻՊ Արման Թաթոյանին մեղադրում են երկակի ստանդարտների մեջ, համաձա՞յն եք այս գնահատականի հետ:
- Իհարկե համաձայն չեմ այս գնահատականի հետ: Արման Թաթոյանին անձնապես ծանոթ չեմ, և դա բոլորովին պարտադիր պայման չէ նրա և նրա ղեկավարած գրասենյակի գործունեությունը գնահատելու համար: ՄԻՊ-ի հրապարակային, թափանցիկ գործունեությունը, հավասարակշիռ և անկողմնակալ դրսևորումները, այս կամ այն դեպքերի առնչությամբ արագ անդրադարձը կամ հայտարարությունները խոսում են նրա պրոֆեսիոնալիզմի, նաև մարդկային և մասնագիտական բարձր որակների մասին: Ի դեպ, պարոն Թաթոյանը նաև կրթությամբ և փորձառությամբ միջազգային ստանդարտներ ապահովող պաշտոնյա է:
- Եթե ՄԻՊ-ը խոսում է ընդդիմությանը պաշտպանելու մասին, կամ կնոջ սեռով պայմանավորված վիրավորանքի մասին ու իշխանության հասցեին է քննադատությունը, իշխող ուժի պատգամավորները դա, այսպես ասած, ծանր են տանում, մինչդեռ Թաթոյանը պարզաբանում է, որ ԱԺ միջադեպն իր համար տհաճ էր, բայց ինքը քաղաքական նշանակության միջադեպի, կոնկրետ մարդկանց վերաբերյալ գնահատական տալ չի կարող: Ի՞նչ գնահատական կտաք ՄԻՊ-ի զեկույցին և ՄԻՊ-ի հասցեին հնչած մեղադրանքներին:
- Քաղաքական մեծամասնության ներկայացուցիչների, մեղմ ասած, հոխորտանքն ու սպառնալի տոնայնությունը բացարձակապես անընդունելի է: Սա արդեն նրանց համար սովորական դարձած ամբարտավանության, անսխալականության, կյանքն ու իրականությունն իրենցով պայմանավորելու, իրենց էլ Հայաստանի հեղափոխական փրկիչներ համարելու բարդույթով է պայմանավորված: Այդ բարդույթն ու անհանդուրժողականությունն ուղղակի չարիքի են վերածվել: Երանի նրանց ինքնավստահությունն ու մեծամտությունը մի փոքր գիտելիքի և փորձառության վրա հենվեր: Եթե ծանոթ լինեին ՄԻՊ-ի մասին ՀՀ օրենքին և այս օրենքից և միջազգային կոնվենցիաներից բխող պարտավորություններին, գուցե իմանային, որ պետական կառավարման մարմինները ՄԻՊ-ի կարգավորման սուբյեկտ չեն: ՄԻՊ-ին դիմելու օրենսդրական արգելք կա:
Մի՞թե կարիք կա այդ ընկերներին հիշեցնելու, որ պատգամավորը ժողովրդի առաջնային մանդատով և անձեռնմխելիությամբ օժտված բարձրագույն կարգավիճակ ունեցող ընտրյալն է: Մի՞թե կարիք կա հիշեցնելու, որ ժողովրդի ընտրյալի վարքը, պատասխանատվությունը, բարոյականությունն ու ինտելեկտը բարձր չափանիշներ են նախատեսում:
Զավեշտական և միաժամանակ ողբերգական էր օրեր առաջ տեսնել, թե ինչպես է ՀՀ վարչապետի ներկայությամբ պատգամավորների «մոռդաբոյի» վկա ԱԺ նախագահ Արարատ Միրզոյանը անզոր գոչում՝ ու՞ր են անվտանգության աշխատակիցները… Շատ-շատ տխուր է: Այս տրամաբանությամբ էլ ուզում են, որ ՄԻՊ-ը իրենց գործունեությանը միջամտի: Ավելի քան տխուր է՝ սա ԱԺ ինստիտուտի ուղիղ արժեզրկումն է, մանդատի արժեքը չեն հասկանում։
- Արդյոք չի՞ ստացվում, որ այլակարծությունը, իրենց արածների մասին ռեալ գնահատականները, իրենց հասցեին անգամ ադեկվատ դիտարկումները իշխանությունն ընդունում է սվիններով:
- Այն, որ քաղաքական մեծամասնությունն առհասարակ այլակարծություն չի ընդունում և պատրաստ չէ երկխոսության, վաղուց է պարզ: Բոլոր ինստիտուտները հնազանդեցնելու, կառավարելի դարձնելու ագրեսիվ բոլշևիկյան մոլուցքի մեջ են: Իրենց թիմից դուրս բոլորին պիտակավորելու և հրեշային ներկայացնելու հիվանդագին ընթացք է:
- Իշխող ուժի կողմից ՄԻՊ-ի հանդեպ արշավ տեսնո՞ւմ եք:
- Այսօրվա խորհրդարանական պատկերը, որոշ պատգամավորների ինքնատիրապետումի դեֆիցիտն ու այդ պաթոսահոխոռտալի, մանիպուլյատիվ ելույթներն այդ մասին են խոսում: Իհարկե, կարելի է և քննադատել, թերություններ գտնել, սակայն հիմնավորված ու բարեկրթության սահմաններում:
Բայց այսօր Արման Թաթոյանի նկատմամբ թիրախավորումն ու ամբարտավան տոնայնությունը անթաքույց էր: Չեն հասկանում, գուցե չգիտեն, գուցե պատվեր են կատարում՝ թիրախավորել, արժեզրկել և քայքայել հերթական կայացած ինստիտուտը: Սա արդեն հստակ վարքագիծ է և անհերքելի ձեռագիր: Ես պարոն Թաթոյանին հարգելու ևս մեկ առիթ էլ ունացա:
Գյումրի-Աշոցք և Գյումրի-Ջաջուռ ավտոճանապարհները փակ են բոլոր տեսակի տրանսպորտային միջոցների համար
Խորհրդարանը երկրորդ ընթերցմամբ քննարկեց հունվարի 27-ը Հիշատակի օր և ոչ աշխատանքային օր սահմանելու նա...
Ով ինչպես է սիրում Հայաստանը
Չորս հայ գերրիներ են վերադարձել Հայաստան
Իրանը չունի ԱՄՆ-ի և Իսրայելի հшրվածներից վնաuված միջnւկային օբյեկտները վերականգնելու ծրագրեր. Արաղչի
Լինդա Էուլջեքջյանը հայտնել է, որ ամուսնու ազատ արձակման մասին իմացել է նույն օրը
«Գոլդեն Ֆլորենս»-ի արտադրական գործունեությունը կասեցվել է
ՀՅԴ-ն որոշում ունի․ որ ուժի հետ դաշինք կկազմի
Ես ուրախ եմ տեսնել հայ գերիների ազատ արձակումը
«Իմացել ենք լուրը, շատ ուրախ ենք». Վագիֆ Խաչատրյանի դուստրը անհամբեր սպասում է գերությունից ազատ արձ...