Համազգային այգի Ծիծեռնակաբերդի տարածքում. Արմեն Սարգսյանը ներկայացրել է «Հայ պարկ» հիմնելու իր գաղափարը

Հանրապետության նախագահ Արմեն Սարգսյանը «Ազատության» եթերում խոսել է Ծիծեռնակաբերդի տարածքում «Հայ պարկ» հիմնելու նախաձեռնության եւ գաղափարի մասին:

Նախագահը նշել է, որ կորոնավիրուսի համավարակից հետո աշխարհը պետք է վերագնահատի ինքն իրեն՝ նկատելով, որ կորնավիրուսից հետոն սկսվում է այսօր. «Հենց այսօր պետք է մտածենք, թե ինչպես ենք ապրելու կորոնավիրուսից հետո: Հայաստանի դեպքում կարելի է, օրինակ, սկսել ամենապարզից՝ հանրային առողջության ոլորտից: Այսօր ես իմ տան պատշգամբից քաղաքի անգամ հեռավոր թաղամասերն եմ տեսնում, Արարատ լեռն է ավելի պարզ երեւում, ինչը նախկինում հնարավոր չէր: Այսինքն, հիմա մեր քաղաքի օդը 2-3 անգամ ավելի մաքուր է, քան կորոնավիրուսից առաջ: Ուրեմն ինչո՞ւ չմտածել այն մասին, որ մենք մաքուր օդ միշտ ունենանք»:

Նախագահն ասել է, որ Երեւանի այգիները նրա «թոքերն» են, եւ, որպեսզի մեր բնակչությունը կարողանա առողջ ապրել, պետք է այգիներ՝ «հանրային առողջ թոքեր» ունենալ:

Այս համատեքստում նախագահ Սարգսյանը ներկայացրել է Ծիծեռնակաբերդի տարածքում «Հայ պարկ» ստեղծելու իր գաղափարը: «Շուտով մենք ոգեկոչելու ենք Հայոց ցեղասպանության զոհերի հիշատակը, հիշեցնելու աշխարհին, որ հայոց ցեղասպանությունը չճանաչելը կամ պատմության դասերը մոռանալը վտանգավոր է ողջ մարդկության համար,-նշել է նախագահը:- Այս առիթով ուզում եմ մի առաջարկ հնչեցնել, որի մասին դեռ տարիներ առաջ էի մտածում: Եթե Եղեռնի հուշարձանից նայեք մինչեւ «Հրազդան» մարզադաշտ, կտեսնեք հսկայական տարածություն, որը, եթե չեմ սխալվում, մոտավորապես 103 հեկտար է։ Այդ տարածքը մշակված չէ, իսկ մեր քաղաքը մեծ այգու կարիք ունի։ Առաջարկում եմ ստեղծել համազգային այգի, որը կսկսվի Եղեռնի հուշարձանից անմիջապես հետո եւ կձգվի այդ 103 հեկտարով»։

Մանրամասնելով այգու ստեղծման գաղափարը՝ նախագահը նշել է. «Տրամաբանությունը հետեւյալն է. այգու առաջին հատվածը կազմված կլինի մասերից, որոնք կներկայացնեն մեր պատմական հայրենիքի շրջանները, ասենք՝ Վանը, Էրզրումը եւ այլն։ Երկրորդ շերտը կներկայացնի սփյուռքահայությանն՝ ամբողջ աշխարհով ապրող մեր հայ ժողովրդին, ենթադրենք՝ Մարսելի, Նյու Յորքի, Մոսկվայի, Նովոսիբիրսկի հայ համայնքները։ Երրորդը՝ մեր հայրենիքի այսօրվա շրջանները, քաղաքներն ու կառույցներն, օրինակ՝ Գյումրի կամ Երեւանի պետական համալսարան։ Այս բաժանումը խորհրդանշական է այն իմաստով, որ ամբողջ տարածքը բաժանվում է առանձին կտորների եւ ծառեր են տնկվում։ Գեղեցիկ կլինի՝ եթե ծառերի քանակը լինի մոտավորապես 1,5 միլիոն՝ յուրաքանչյուր զոհի համար մեկ ծառ։ Այս այգին կնկարագրի մեր պատմական կորուստները եւ, միաժամանակ, այսօրվա հայկական աշխարհը, հայկական պետականությունը՝ Հայաստանով եւ Արցախով։ Ընդ որում՝ այգու առանձին կտորները բաժանելով եւ անուններ տալով, կարող ենք քաջալերել, որ օրինակ՝ վանեցիները վերցնեն այգու Վանա տարածքը եւ մշակեն։ Սա կդառնա համազգային այգի, հայկական այգի, Հայ պարկ»:

Նախագահ Սարգսյանը կարեւոր է համարել, որ այգին մնա այգի եւ չդառնա ռեստորանների շարք։ Նա նշել է, որ ժամանակին այս գաղափարը քննարկել է Եվրոպայի ամենահայտնի այգիների դիզայներներից մեկի հետ, որի գրասենյակը նույնիսկ ձեւակերպել է գաղափարը:

«Կառավարությանը, վարչապետին եւ քաղաքապետին իմ նամակով առաջարկել եմ, որպեսզի այս հարցը քննարկենք,-ասել է Հանրապետության նախագահը:-Նախ, սա առաջարկություն է, որ ինչ-որ ձեւով հիշենք 105 տարի հետո մեր հսկայական կորուստները՝ եւ՛ մարդկային, եւ՛ պատմական, եւ՛ մշակութային, մյուս կողմից՝ համազգային ձեւով, բոլորիս համերաշխ աշխատանքով ստեղծենք այգի, որը հենց մեր անունն էլ ունենա՝ «Հայ պարկ»։ Մենք աշխարհին ցույց կտանք, որ այս դժբախտությունից ճիշտ եզրակացություն ենք արել եւ Երեւանին նոր թոքեր կպարգեւենք, որ մեր քաղաքն իր բնակիչներով ավելի առողջ պայմաններում ապրի, որովհետեւ 1,5 միլիոն ծառը մեր քաղաքի օդը շատ ավելի առողջ է դարձնելու։ Կարծում եմ՝ նույնը կարող ենք անել Գյումրիում կամ մյուս քաղաքներում, որոնք կարիք ունեն այգիների»:

Նախագահի խոսքով՝ «Հայ պարկ»-ի հիմնման գաղափարը համազգային ծրագիր է. «Եթե կառավարությունը, քաղաքապետարանը հաստատեցին այդ գաղափարը, ես ինքս անձամբ, որպես նախագահական նախաձեռնություն կլծվեմ դրամահավաքին եւ աշխատանքների կազմակերպմանը, որովհետեւ կարծում եմ, որ սա շատ կարեւոր ներդրում կլինի տարբեր իմաստներով՝ եւ՛ ազգային միասնություն ստեղծելու, եւ՛ մեր պատմության նկատմամբ հատուկ վերաբերմունքի, եւ՛ հանրային առողջության, եւ՛ ընդհանրապես»։