Արմեն Թավադյանի գործով նախագահող դատավորը գործը փոխանցել է այլ դատավորի

Այսօր՝ ապրիլի 15-ին կայացավ «5-րդ ալիք» ՀԸ սեփականատեր Արմեն Թավադյանի եւ Վարուժան Մկրտչյանի գործով առաջին դատական նիստը։

Նիստին Երեւանի ընդհանուր իրավասության դատարանի նախագահ Արթուր Մկրտչյանը Թավադյանի եւ Մկրտչյանի վերաբերյալ քրեական գործը փոխանցել է Երեւանի ընդհանուր իրավասության դատարանի դատավոր Կարեն Ֆարխոյանին։ Այս մասին NEWS.am-ին հայտնեց Թավադյանի պաշտպան Հովհաննես Խուդոյանը։

Նշենք, որ քրեական գործն էլ միացվել է դատավոր Կարեն Ֆարխոյանի վարույթում գտնվող՝ Վարդգես Գասպարին՝ ընդդեմ Արմեն Թավադյանի քրեական գործին:

Հիշեցնենք, որ Արմեն Թավադյանը մեղադրվում է «Մարտի 1»-ի գործով տուժողներից մեկին ենթադրաբար կաշառելու մեջ, որպեսզի դատարանում սուտ ցուցմունք տա։ Թավադյանը 2 ամիս գտնվել է կալանքի տակ։

Նշենք, որ մարտի 12-ին, Վերաքննիչ քրեական դատարանը, դատավոր Ալեքսանդր Ազարյանի նախագահությամբ Արմեն Թավադյանին ազատ արձակելու որոշում կայացրեց։ Լրագրողների հետ զրույցում Թավադյանի պաշտպան Հովհաննես Խուդոյանն ասել էր, որ բողոքը բավարարելու պատճառը եղել է հիմնավոր կասկածի բացակայությունը։