Իսպանիան վարակվածների թվով երկրորդ տեղում է՝ անցնելով Իտալիային

Աշխարհում նոր տիպի կորոնավիրուսային վարակով՝ COVID-19-ով վարակվածների թիվը հասել է 1 միլիոն 034 հազար 163-ի: «Արմենպրես»-ի հաղորդմամբ, կորոնավիրուսի հետազոտական կենտրոնների տվյալների համաձայն՝ մահացածների թիվն անցել է 54 հազարից: Ապաքինվել է ավելի քան 220 հազար 025 մարդ:

Վիրուսից վարակվածների թվով առաջին տեղում հայտնված ԱՄՆ-ում 245 հազար 442 հաստատված դեպք կա: Այստեղ մահացածների թիվն անցել է 6 հազարը: Անցնելով Իտալիային՝ վարակվածության ցուցանիշով երկրորդ տեղում հայտնվել է Իսպանիան, այստեղ հաստատված դեպքերի թիվը կազմում է 117 հազար 710: Մեկ օրում 5 հազարից ավելի վարակվածության նոր դեպք է գրանցվել: Իսպանիայում մահերի ընդհանուր թիվը կազմում է 10 հազար 935:
Իտալիան վարակվածների թվով արդեն երրորդն է: Այստեղ հաստատված դեպքերի ընդհանուր թիվը 115 հազար 242 է: Վարակից մահացել է 13 հազար 915 մարդ:
Կորոնավիրուսից վարակվածության ցուցանիշով Գերմանիան ևս գերազանցել է Չինաստանին՝ հայտնվելով չորրորդ տեղում. եվրոպական այդ երկրում 85 հազար 903 հաստատված դեպքեր կան: Մահերի թիվը կազմում է 1 122:
Գերմանիային հաջորդում է Չինաստանը՝ 81 հազար 620 ընդհանուր և ընդամենը 31 նոր դեպքերով։ Վարակի ծագման այս երկրում մահացել է 3 հազար 322 մարդ։
Ֆրանսիայում վարակվածության դեպքերի ընդհանուր թիվը 59 հազար 105 է: Մահացության ցուցանիշը 5 հազար 387 է: Իրանում հաստատված դեպքերի ընդհանուր թիվը 53 հազար 183 է: Մահացածների ընդհանուր թիվը կազմում է 3 հազար 294: Մեծ Բրիտանիայում հաստատված դեպքերի թիվը 33 հազար 718 է, Շվեյցարիայում՝ 19 հազար 303, Թուրքիայում՝ 18 հազար 135։
Վրաստանում կորոնավիրուսով վարակվածության հաստատված 148 դեպք կա, Ռուսաստանում` 4 հազար 149: Մեկ օրում 600-ից ավելի նոր դեպք է գրանցվել: ՌԴ-ում մահացել է 34 մարդ:
Առողջապահության համաշխարհային կազմակերպության տվյալներով՝ վարակ արձանագրած երկրների և տարածքների թիվը հասել է 204-ի։

Անգելա Մերկելի ինքնամեկուսացման ժամկետն ավարտվել է

Գերմանիայի կանցլեր Անգելա Մերկելի ինքնամեկուսացման ժամկետն ավարտվել է և նա սկսել է նստավայրից աշխատանքը մի քանի անգամ թեստի բացասական արդյունք ունենալուց հետո:
Անգելա Մերկելը ինքնամեկուսացվել էր և անցել էր տնային պայմաններում աշխատանքի այն բանից հետո, երբ պարզվել էր, որ իրեն պատվաստած բժշկի մոտ կորոնավիրուս է հայտնաբերվել:

Մեծ Բրիտանիայում բարձրաձայնում են կադրային խնդիրների մասին

Լոնդոնի ցուցահանդեսային կենտրոնը դարձել է ժամանակավոր հոսպիտալ կորոնավիրուսով վարակված հիվանդներին ընդունելու համար: Նախատեսվում է ավելացնել նման հիվանդանոցների թիվը: Պետական բուժհաստատություններից ժամանակավոր հոսպիտալ են ուղարկել բժիշկների ու բուժաշխատողների: Նրանց աջակցում են զինվորական բժիշկներն ու կամավորները: Արդեն առանձնացված է 500 տեղ, սակայն նախատեսվում է այդ թիվն ավելացնել: Բժիշկների շրջանում մտահոգություն կա անձնական պաշտպանության համար նախատեսված պարագաների սակավության առնչությամբ:
Բրիտանիայի կառավարությունը հայտարարում է, որ բժիշկները շուտով կստանան անհրաժեշտ պարագաներ ու սարքավորումներ, այդ թվում 170 մլն դիմակ: Ամեն դեպքում պակաս կա, դա նշանակում է, որ առկա է բուժանձնակազմի կողմից վարակվելու ռիսկ:
Շնչառական արհեստական հետ կապված խնդիր ևս կա: Ներկայում մեծ թվով ապարատների արտադրություն է սկսվել, սակայն հարց է՝ արդյոք կա՞ն անհրաժեշտ թվով վերապատրաստված մասնագետներ, որպեսզի սովորեցնեն, թե ինչպես պետք է կիրառել դրանք: Մասնագետները կարևորում են կամավորների ներգրավվածությունը, սակայն պնդում են, որ որակավորված բժիշկների անհրաժեշտություն կա:

Վարակի թեժ կետ համարվող ԱՄՆ-ում ապահովագրություն չունեցողները խնդրի առաջ են կանգնել

ԱՄՆ-ում մեկ օրվա ընթացքում մահացության ցուցանիշը կազմել է 1169: Վարակի բռնկումից ի վեր երկրում սա ամենաբարձր ցուցանիշն է: «Euronews»-ը տեղեկացնում է, որ երկրի բազմաթիվ բնակիչներ չունեն բժշկական ապահովագրություն: Եվ թե ինչ ֆինանսավորմամբ պետք է կազմակերպվի նրանց բուժումը, դեռ հայտնի չէ: Իր ամենօրյա բրիֆինգի ժամանակ ԱՄՆ նախագահն անդրադարձել է այս թեմային:
«Մենք հիմա կոնգրեսի միջոցով փորձում ենք նոր հնարավորություններ սահմանել, որոնք թույլ կտան այդ մարդկանց ստանալ գումար և դրանով վճարել բուժման համար: Նախկին օրենսդրական կարգավորումներն այս իրավիճակում չեն աշխատում»,-ասել է նախագահ Թրամփը:
ԱՄՆ նախագահն անդրադարձել է նաև հիվանդանոցներում անհրաժեշտ պարագաների ու սարքավորումների խնդրին: Նա նկատել է, որ առաջիկայում կսկսեն ժամանել առաջին խմբաքանակները, իսկ պահուստ ունենանալու համար ժամանակ է պետք: Նա նշել է, որ ԱՄՆ-ն ինքը կարող է արտադրել անհրաժեշտ սարքավորումներ:
«Մենք ներկայում որպես երաշխավոր ենք հանդես գալիս, ապահովագրում ենք, սակայն ուղղակի ձևով չենք զբաղվում պատվերների տեղակայմամբ»,-ասել է նա:
Բժշկական անձնակազմն իր զարմանքն է հայտնել անհրաժեշտ պարագաների պակասության առնչությամբ: Նրանք պհանջում են անհապաղ լուծել այդ հարցը:

«Կորոնա» գարեջուրը ժամանակավորապես դադարեցնում է արտադրությունը

Մեքսիկական «Grupo Modelo» ընկերության ղեկավարը հայտարարել է, որ ժամանակավորապես դադարեցնում է «Կորոնա» ապրանքանիշի գարեջրի և մի շարք այլ արտադրատեսակների արտադրությունը: Աշխարհի 180 երկիր արտահանվող գարեջուրն արտադրող ընկերության տնօրենը հայտնել է, որ արտադրության դադարեցումը կապված է Մեքսիկայում արտակարգ դրության հայտարարման և տնտեսական սահմանափակումների հետ:

Ուկրաինա մուտք գործողները կմնան երկշաբաթյա պարտադիր կարանտինում

Կորոնավիրուսով պայմանավորված՝ Ուկրաինայի կառավարությունը որոշում է կայացրել բաց թողնել միայն սահմանային 21 անցակետ: «Արմենպրես»-ի հաղորդմամբ, այս մասին տեղեկացնում է ՏԱՍՍ գործակալությունը:
«Կորոնավիրուսից պաշտպանվելու համար մենք շարունակում ենք միջոցներ ձեռնարկել սահմաններին: Ուկրաինայի պետական սահմանային անցակետերից կգործի միայն 21-ը»-հայտարարել է վարչապետ Դենիս Շմիգալը: Նա տեղեկացրել է, որ երկիր մուտք գործողները պետք է մնան պարտադիր կարանտինի մեջ երկու շաբաթ:
Պարտադիր կարանտինի դեպքում կան բացառություններ՝ դիվանագետներ, միջազգային կազմակերպությունների անդամներ և այլն:

Չեխիայում նախարարները տուգանվել են դիմակներ չկրելու համար

Չեխիայի իշխող կոալիցիայի անդամ սոցիալ-դեմոկտարատական կուսակցության ներկայացուցիչները տեսաբրիֆինգ են անցկացրել առանց դիմակների: Դրա համար նրանք վճարել են տուգանք 10 հազար կրոն (400 ԱՄՆ դոլար): Պետության կողմից սահմանված կարանտինի կանոնների համաձայն բոլոր քաղաքացիները, ովքեր տանը չեն, պարտավոր են դիմակներ կրել: Այդ պահանջը չկատարելու դեպքում ոստիկանությունը կարող է տուգանել 10 հազար կրոնի չափով:
Տեսաբրիֆինգին ներկա լրագրողներից մեկը հետաքրքրվել է, թե ինչու են սոցիալ-դեմոկարատական կուսակցության նախարարներն առանց դիմակների: Ներքին գործերի նախարար Յան Գամաչեկը նշել է, որ չի պատրաստվում արդարանալ, դա իր կողմից սխալ է եղել, կանոնները գործում են բոլորի համար: Նա «Թվիթեր»-ում տեղեկացրել է, որ 10 հազար կրոն կփոխանցի հիվանդանոցներից մեկին:
Իր հերթին բրիֆինգի հաջորդ մասնակիցը՝ աշխատանքի նախարար Յանա Մալաչովան «Թվիթեր»-ում ներողություն է խնդրել իր և իր ամուսնու կողմից, ով արտաքին գործերի նախարարի տեղակալն է, և տեղեկացրել է, որ արդեն 20 հազար կրոն են փոխանցել հասարակական կազմակերպություններից մեկին:

Տորոնտոյում սահմանվել է խոշոր տուգանք սոցիալական հեռավորությունը չպահպանելու համար

Կանադայի Տորոնտո քաղաքի իշխանությունները սահմանել են 3 հազար 500 ԱՄՆ դոլարի չափով տուգանք հասարակական վայրերում միմյանցից երկու մետր հեռավորությունը չպահելու համար: «Միասին չապրող ցանկացած երկու մարդու կողմից զբոսայգիներում, հրապարակներում միմյանց միջև երկու մետր հեռավորությունը չպահպանելուն կհետևի դատական գործընթաց: Կախված դատավճռից՝ կարող է սահմանվել մինչև 5 հազար կանադական դոլարի չափով տուգանք (3 538 ԱՄՆ դոլար)»,-ասվում է քաղաքային խորհրդի որոշման մեջ:

Չինաստանում հարգանքի տուրք կմատուցվի ի հիշատակ կորոնավիրուսի զոհերի

Չինաստանում ապրիլի 4-ին հարգանքի տուրք կմատուցվի կորոնավիրուսի հետևանքով մահացածների հիշատակին: Հիշատակի արարողության ընթացքում ինչպես Չինաստանում, այնպես էլ տարբեր երկրներում կիջեցվեն Չինաստանի դիվանագիտական ներկայացուցչությունների պետական դրոշները: Ժամանցային բոլոր ծրագրերն ու միջոցառումները կհետաձգվեն:
Ապրիլի 4-ին տեղական ժամանակով 10:00-ին ամբողջ Չինաստանըերեք րոպե լռությամբ կհարգի զոհերի հիշատակը: Ի նշան վշտի՝ կհնչեն նաև ավտոմեքենաների, նավերի, գնացքների ազդանշանները: