22 ամսում՝ $ 390.000, ամսական՝ մոտ $ 18.000 պարգևավճար ՏՄՊՊՀ-ին՝ «խուճապային գռփումների» պայմաններում

Yerkir.am-ը գրավոր հարցում էր ուղարկել ՀՀ տնտեսական մրցակցության պաշտպանության պետական հանձնաժողովի նախագահ Գեղամ Գևորգյանի անունով՝ խնդրելով տեղեկություններ այն մասին, թե որքա՞ն է կազմել իր ղեկավարած հիմնարկի աշխատակիցներին վճարված պարգևավճարների ընդհանուր չափը (մեկ թվով)՝ 09.05.2018 թվականից մինչև 29.02.2020 թվականը և որքա՞ն է հիմնարկի աշխատակիցների թիվն այս պահին:

Ստացված գրավոր պատասխանում (կցվում է) նշված է, որ նշված ժամանակահատվածում ՀՀ տնտեսական մրցակցության պաշտպանության պետական հանձնաժողովի աշխատողներին տրամադրված պարգևավճարների ընդհանուր չափը կազմել է 187.892.678 ՀՀ դրամ (ավելի քան $ 390.000), որը ամսական կազմում է մոտ $ 18.000:

Հիմնարկի աշխատողների թվաքանակը 96 է:

Փաստենք, որ, օգտվելով ազգաբնակչության շրջանում առկա խուճապային տրամադրություններից՝ ՀՀ որոշ խոշոր ընկերություններ այս օրերին թանկացրել են պարենային ապրանքների գները: Yerkir.am-ի ուսումնասիրմամբ՝ Բաղրամյանի ալյուրը, օրինակ, այս օրերին խանութներին տրամադրվում է կգ-ը 20 դրամով թանկացված, շաքարավազը՝ 10 դրամով և այլն (այս դեպքում երկու ապրանքներն էլ մատակարարվում են ոչ պաշտոնապես Սամվել Ալեքսանյանին պատկանող ընկերությունների կողմից):

Նորություն չէ նաև կրկին խուճապային այս օրերին դեղատների կողմից դիմակների և որոշ ախտահանող նյութերի՝ արհեստական թանկ վաճառելու, ավելին՝ ՀԴՄ-ների վրա բոլորովին այլ գներ, քան հաճախորդից փաստացի գանձվածը, արտացոլելու զանգվածային դեպքերը:

Նույնկերպ՝ ազգաբնակչությունն արդեն վարժվել է այն իրողությանը, որ Զատկին թանկանալու է ձուն, Մարտի 8-ին՝ ծաղիկը, հունվարի 6-ին՝ ձուկը, Ամանորին՝ ամեն ինչը և այդպես շարունակ: Ավելին՝ բավական է, որ տնտեսվարողներն այսօր մի լուր կարդան՝ Կրասնոդարում ցորենի կամ Բրազիլիայում՝ շաքարավազի գների որոշակի տեղաշարժերի մասին, և վաղն առավոտյան իսկույն դա նկատելի է դառնում Երևանի հացի փռերում կամ խանութներում:

Այսինքն՝ ազատ շուկայական հարաբերություններում մեր տնտեսվարողները գործում են «ազատ»՝ բառի վատագույն իմաստով, և ազգաբնակչությունը որևէ կերպ իր վրա չի զգում պետական այս մարմնի գոյությունն ու գործունեությունը:

Հետաքրքիր է՝ այդ նույն ազգաբնակչությունը տեղյա՞կ է, որ պետական այդ կազմակերպությունը տնտեսվարողների նման «թավշյա գռփումների» համար ամսական պարգևատրվում է $ 18.000-ով: