«Հեղափոխության պահապաններ» խմբի արարքների պատասխանատուն Նիկոլ Փաշինյանն է. Գագիկ Համբարյան

Լավ կլինի, որ պարոն Փաշինյանն իր իրական դեմքը ցույց տա հասարակությանը՝ որպես Ադոլֆ Հիտլերի և Բենիտո Մուսոլինիի արժանի հետևորդ: Այս մասին Tert.am-ի հետ զրույցում ասաց քաղաքագետ Գագիկ Համբարյանը՝ անդրադառնալով «Հեղափոխության պահապաններ» խմբի գործունեությանը, երբ վերջիններս վարչապետին հայհոյած քաղաքացուն ստիպել էին ներողություն խնդրել նրանից։

Նրա խոսքով՝ նմանատիպ գործողություններ տեղի են ունեցել 20-րդ 20-30-ական թվականներին ֆաշիստական Իտալիայում և Գերմանիայում:

«Անկեղծ ասած ես սպասում էի այսպիսի լկտի պահվածքի, ցավոք սրտի, իմ սպասումներն այս առումով արդարացան: Այնպես չէ, որ պարոն Փաշինյանի կողմնակիցները և նրա թիմակիցները նորամուծություններ են մտցրել իրենց գործելաոճում, նրանք ընդօրինակել են ֆաշիստական Իտալիայի առաջնորդ Բենիտո Մուսոլինիի և ֆաշիստական Գերմանիայի առաջնորդ Ադոլֆ Հիտլերի ծրագիրը, ովքեր պետության մեջ ունեին իրենց ստեղծած ահաբեկչական կազմակերպությունները: Այդ խմբերն ունեին արտոնություններ՝ իշխանություններին քննադատող մարդկանց հետապնդելու, ծեծելու, վերացնելու»,- նշեց քաղաքագետը:

Հիշեցնենք, որ համացանցում տարածվում է տեսանյութ, որտեղ իրենց «Հեղափոխության պահապաններ» անվանող մի խումբ տղամարդիկ մեկ այլ տղամարդու ստիպում են ներողություն խնդրել վարչապետ Նիկոլ Փաշինյանից: Ըստ խմբի անդամների՝ տղամարդն այն անձն է, որը զանգահարել և «Ֆեյսբուքում» հրապարակել է իր և մետրոյում «Այո»-ի բուկլետը պատռած և վարչապետի վրա նետած աղջկա հեռախոսազրույցը, որտեղ երիտասարդը Նիկոլ Փաշինյանի հասցեին հայհոյանքներ էր հնչեցրել։

Վարչապետը նախօրեին Վայքում անցկացվող քարոզարշավի ընթացքում անդրադարձել էր այս խմբի գործունեությանը՝ անընդունելի համարելով նրանց արարքը և դատապարտելով այն: Իսկ Ոստիկանությունը նյութեր է նախապատրաստում:

Ըստ Գագիկ Համբարյանի՝ իշխանությունները հրապարակային դատապարտելով նման երևույթները, փորձում են հերքել իրենց առնչությունը «Հեղափոխության պահապաններ» խմբին:

«Անպայման գործեր պետք է հարուցեն, որպեսզի նաև հանրությանը ապացուցեն, որ իրենք որևիցե առնչություն չունեն սրա հետ: Պետք է նշեմ, որ նույն Իտալիայում և Գերմանիայում ևս ժամանակին քրեական գործեր էին հարուցվում, որոնք մնում էին չբացահայտված: Լավ կլինի, որ գործող իշխանություններն իրենց կամակատար խուլիգանական խմբերին կարգի հրավիրեն, որովհետև սա կբերի էլ ավելի մեծ խնդիրների հասարակության մեջ: Հասարակության պառակտումը սևերի և սպիտակների ավելի դաժան ընթացք կստանա, ընդհուպ մինչև խոշոր բախումներ»,- նշեց նա:

Քաղաքագետի համոզմամբ՝ այս ամենի պատասխանատուն վարչապետ Նիկոլ Փաշինյանն է, որքան էլ նա իր ելույթներում փորձի դատապարտել խմբի գործողությունները. «Այդ ահաբեկչական խումբն ունի իր ֆեյսբուքյան էջը, նրանք չեն թաքցնում իրենց դեմքերը, բավական ակտիվ գործում են, մարդկանց նվաստացման գործընթացը նկարահանում և տեղադրում են համացանցում: Այս ամենից հետո պարոն Փաշինյանը ընդամենը դատապարտո՞ւմ է, սա ոչ թե զավեշտ է, այլ ողբերգություն»,- ասաց նա:

Գագիկ Համբարյանը նաև նկատեց, որ «Հեղափոխության պահապաններ» խմբի նման կազմակերպություններ ստեղծվել են նաև գունավոր հեղափոխություն իրականացված երկրներում՝ Վրաստանում, Ուկրաինայում:

«Այս երկրներում այդ նույն հեղափոխության պահապան կոչվածները հարձակվում էին նախկին կամ դեռևս գործող իշխանությունների ներկայացուցիչների վրա, նետում էին աղբարկղերը, վիրավորում էին, հարձակվում և ծեծի էին ենթարկում այդ մարդկանց: Այնպես որ, այն, ինչը տեղի է ունենում Հայաստանի Հանրապետությունում, գրեթե նույնաբովանդակ ձեռագրով ժամանակին տեղի է ունեցել տարբեր երկրներում, որոնք վերապրել են գունավոր հեղափոխություններ: ՀՀ-ում չգիտես ինչու այն անվանվեց «թավշյա հեղափոխություն», որն իրականում այդպես չէ: Վերջին գործընթացները բացահայտ ցույց են տալիս, որ մեզ մոտ տեղի է ունենում այն, ինչը շատ դեպքերում տեղի է ունեցել գունավոր հեղափոխություն վերապրած երկրներում»,- նշեց քաղաքագետը: