Իշխանությունը ինքն իրեն թակարդն է գցել և շատ լավ գիտակցում է, որ հանրաքվեի արդյունքները որևէ կողմի վստահություն չեն ներշնչելու. Արա Վարդանյան

Քաղաքագետ Արա Վարդանյանը ֆեյսբուքյան էջում գրառում է կատարել և անդրադարձել այս օրերին իրականացվող քարոզարշավին՝ ուշադրություն հրավիրելով այն հանգամանքի վրա, որ վարչապետի հանդիպումների՝ թռչող սարքերից արված լուսանկարներ չկան:

Ըստ Արա Վարդանյանի՝ բանն այն է, որ իրականում այս օրերին ապահովվում է միայն տպավորություն, այսպես կոչված «մասովկա», համաձայն որի՝ պետք է ստեղծվի տպավորություն, իբրև ամեն տեղ բազմամարդ է, որպեսզի հետո էլ ընտրությունները սարքեն և կասկածներ չլինեն։

«Մի հետաքրքիր տեղեկություն էլ տամ ձեզ։ Պարզվում է այս ընտրությունը լինելու է նաև աննախադեպ միջազգային դիտորդների սակավության առումով, այսօրվա տվյալներով գրանցված է միայն մեկ միջազգային դիտորդական կազմակերպություն»,- գրել է քաղաքագետը և հավելել, որ իր տվյալներով վերջերս իշխանական պատգամավոր Վլադիմիր Վարդանյանը մեկնել է Բրյուսել և փորձել համոզել եվրոպացիներին, որ գան և հետևեն քվեարկությանը, սակայն ապարդյուն։

«Մի խոսքով իշխանությունը ինքն իրեն թակարդն է գցել և արդեն իսկ շատ լավ գիտակցում է, որ այս քվեարկության արդյունքները վստահություն չեն ներշնչելու որևէ կողմի մոտ»,-ամփոփել է Արա Վարդանյանը: