Եթե հանրաքվեն ժողովրդի պահանջն էր, ինչո՞ւ եք այսօր դռնդեդուռ ընկած համոզում. Արա Վարդանյան

«Հայաստան» համահայկական հիմնադրամի նախկին տնօրեն Արա Վարդանյանը այսօր՝ մարտի 11-ին, մամուլի ասուլիսն սկսեց ԱԺ պատգամավոր Գայանե Աբրահամյանի Թեղուտում արված գրառումից․ «8 համայնքի մի շարք կիրթ, բայց ջղայնացած պապի ասել են․ «ԱՅՈ-ն ասիլդենք, բայց թավիշ-մավիշ դրեք մի կողմ։ Ոնց իրանք մարտի 1-ին ու հոկտեմբեր 27-ին մտան կտրեցին, ընենց էլ դուք իրանց կոտորեք»։ Ես էլ պատասխանեցի․ հենց դա չկրկնելու համար ենք հեղափոխություն արել»,- գրել է պատգամավորը։

Արա Վարդանյանի կարծիքով՝ այս գրառումը ցույց է տալիս իշխանությունների գործելաոճը։

«Մենք կրկին գործ ունենք մի պարզ իրողության հետ, որ այս իշխանությունը չկարողանալով որևէ փոփոխություն մտցնել մարդկանց կյանքում՝ դիմում է հեղափոխական մեթոդների, այսինքն՝ մարդկանց ինչ-որ կրիզիսային վիճակներում պահելն է՝ սպանություններից խոսելը, թավիշից խոսելը, ատելության քարոզը, որը վարչապետի գլխավորությամբ իրականացվում է հենց առաջին օրվանից։ Կարծում եմ, որ այս հանրաքվեն սարքովի է։ Ես կարծում եմ, որ այս հանրաքվեում իրական տեսանկյունից որեւէ ձեւ չկա, որպեսզի ԱՅՈ-ն հաղթի։ Ես կասկած չունեմ, որ լինելու է բառից բուն իմաստով սարքոցի։ Չգիտեմ՝ ոնց են այդ ձայները ապահովելու, բայց ինչ-որ մեխանիզմ երեւի արդեն հնարել են, եթե գնան հանրաքվեի։ Ես նույնիսկ կասկածում եմ, որ կարող է հանրաքվե չլինի։ Պետք է հասկանաք մի պարզ բան, որ մեր ժողովրդին ձեռ են առնում։ Մենք պետք է հիշենք, որ 1-2 ամիս առաջ Ազգային ժողովում համոզում էին, որ սա ժողովրդի պահանջն է, բայց այդ դեպքում ինչո՞ւ են դռնեդուռ ընկել։ Ժողովուրդը հոգնել է, թողեք այս ազգը ոտքի կանգնի։ Եթե սա ժողովրդի պահանջն է, ուրեմն հանգիստ, իրենց բառերով, վեր ընկեք ձեր գործի տեղերում եւ գործ արեք այս ժողովրդի համար, ժողովուրդն էլ, քանի որ իր պահանջն է, կգնա եւ այդ ԱՅՈ-ն կքվեարկի։ Բայց տեսնում ենք հակառակը, որ ժողովուրդին համոզում են գնալ եւ մասնակցել հանրաքվեին։ Այսինքն՝ սրանով կարող ենք ապացուցված համարել եւս մեկ սուտ, որ իշխանությունը մատուցում էր ժողովրդին, որ սա ժողովրդի պահանջն էր եւ այսօր փորձում է հենց այդ նույն ժողովրդին համոզել կողմ քվեարկել»։

Ըստ Արա Վարդանյանի՝ իշխանությունները շատ լավ օգտագործում են պոպուլիստական բոլոր մեթոդները։

«Օրինակ, երբ վարչապետը ուղղաթիռից լայվ էր մտել, իսկ խոսնակը հայտարարել էր, որ օրենքի խախտում տեղի չի ունեցել, ապա թող նույն ուղղաթիռը տրամադրվի ՈՉ-ով զբաղվող իրավաբանների թիմին, որպեսզի նրանք էլ մի քանի մարզ այցելեն քարոզչության նպատակով։ Նիկոլ Փաշինյանը կրկին ապացուցում է ևս մեկ սուտ՝ նա այն մարդն է, որ ասում էր, որ բիզնեսն ու քաղաքականությունը պետք է տարանջատված լինեն։ Մինչդեռ դրամահավաքը այլ բան ապացուցեց։ Այս իշխանությունը գալիս էր աղքատին հարստացնելու, ի՞նչ է իրականում տեղի ունենում։ Հարուստը հարստանում է, աղքատը ավելի աղքատանում՝ սկսած համահարթեցումից։ Փաշինյանն ընտրել է թիրախ՝ երկրորդ և երրորդ նախագահներին, և փորձում է ժողովրդի մեջ զայրույթ ստեղծել», – ասաց Արա Վարդանյանը։