Նոր օրինագիծ. Ծնողական եւ աշակերտական խորհուրդները կարող են ներգրավվել դպրոցի տնօրենի ընտրության գործընթացում

Ազգային ժողովում քննարկվել են «Հանրակրթության մասին» ՀՀ օրենքում լրացումներ ու փոփոխություններ կատարելու մասին» եւ ««Երեւան քաղաքում տեղական ինքնակառավարման մասին» ՀՀ օրենքում լրացում կատարելու մասին» օրենքների նախագծերը եւ դրանք երկրորդ ընթերցմամբ ամբողջությամբ ընդունելու մասին հարցը:

Առաջինից երկրորդ ընթերցում ընկած հիմնական փոփոխությունները ներկայացրել է ՀՀ կրթության, գիտության, մշակույթի եւ սպորտի նախարար Արայիկ Հարությունյանը՝ նշելով, որ դրա հետ կապված բավականին արդյունավետ քննարկումներ են անցկացվել ԱԺ կրթության, գիտության, մշակույթի, սփյուռքի, երիտասարդության եւ սպորտի հարցերի մշտական հանձնաժողովում։

Ըստ նախարարի՝ սկզբունքային հարցերից մեկը վերաբերել է հեռավար կրթությանը, եւ քանի որ բոլոր խմբակցություններն այս ձեւակերպման հետ կապված ունեցել են մտավախություններ, նախարարությունը այդ դրույթը վերաձեւակերպել է այնպես, որ հեռավար կրթությունը դիտարկվի որպես կրթական ծրագրի իրականացման ձեւ։ «Հանվել է այլընտրանքային ձեւը, որպեսզի դպրոցների համար պատրվակ չդառնա, որ վերջիններս ամբողջությամբ անցնեն հեռավար կրթության, եթե հնարավորություն կա ներգրավվել նոր մասնագետի: Հեռավար կրթությունը հիմնական հանրակրթական ծրագրերի կազմակերպման ընթացքում կարող է կիրառվել կրթության պետական կառավարման լիազոր մարմնի սահմանված կարգով բացառիկ դեպքերում եւ որոշակի ժամկետներում»,-հստակեցրել է Արայիկ Հարությունյանը՝ մանրամասնելով, որ եթե, դիցուք, երկու անգամ ուսուցչի մրցույթ է կազմակերպվել եւ տվյալ տեղի համար դիմորդ չի եղել կամ մրցույթը չի կայացել, ապա կարող է իրականացվել հեռավար կրթություն, բայց նաեւ սահմանվում է, թե ինչ ժամկետով է այն իրականացվելու եւ երբ է հայտարարվելու հաջորդ մրցույթը:

Երկրորդ փոփոխությունը վերաբերել է պետական ուսումնական հաստատություններն անվանակոչելու կրթության պետական կառավարման լիազոր մարմնի սահմանած կարգին:

Հաջորդ փոփոխությունը՝ մանկավարժական, ծնողական եւ աշակերտական խորհուրդները ՀՀ կառավարության հաստատած կարգով կարող են ներգրավվել դպրոցի տնօրենի ընտրության գործընթացում՝ սրանով մեծացնելով վերջիններիս դերակատարությունը:

Սովորողների ընդունելության կազմակերպման գործընթացում առաջնահերթությունը կտրվի տվյալ դպրոցում քույր եւ եղբայր ունեցող, ինչպես նաեւ տվյալ դպրոցի աշխատակիցների երեխաներին՝ հաշվի անելով նաեւ նախորդ տարվա ընդունելության ժամանակ հնչեցված հիմնական բողոքները:

Սահմանվել է պարտադիր կրթությունից դուրս մնացած երեխաների բացահայտման եւ ուղղորդման կարգը:

Սահմանվել են ուսումնական հաստատությունների վարչական եւ մանկավարժական աշխատողների, ինչպես նաեւ աշակերտների եւ ծնողների էթիկայի նորմերը:

Փոփոխվել են տարվա լավագույն ուսուցիչ, տնօրեն եւ դաստիարակ մրցույթների անվանակարգերը:

Սահմանվել է հանրակրթական ծրագրեր իրականացնող ուսումնական հաստատությունների երկարօրյա ուսուցման կազմակերպման կարգը:

Սահմանվել է, որ կրեդիտային համակարգը ներդրվում է միայն 10-12-րդ դասարաններում:

Նոր օրինագիծ. Ծնողական եւ աշակերտական խորհուրդները կարող են ներգրավվել դպրոցի տնօրենի ընտրության գործընթացում

Վերջին 7 օրվաԹոփ լուրեր Թոփ 10ամենաընթերցվածէջերը

Վերջին 7 օրվա
Թոփ լուրեր Թոփ 10
ամենաընթերցված
էջերը