Կառավարությունը վաճառքի է հանում «Երվերելակ» ընկերությունը՝ դասական աճուրդով. Մեկնարկային գինը 100 մլն դրամ

ՀՀ կառավարությունն իր այսօրվա՝ մարտի 5-ի իր նիստում որոշում է կայացրել թույլատրել ՀՀ տարածքային կառավարման եւ ենթակառուցվածքների նախարարության պետական գույքի կառավարման կոմիտեին իր ենթակայության` 109,49 մլն դրամ գնահատված ակտիվներ ունեցող «Երվերելակ» ՓԲԸ-ի (գտնվելու վայրը` ք. Երեւան, Մասիսի նրբ. 13) 100 տոկոս պետական բաժնետոմսերը (1364 հատ, յուրաքանչույրը 4427 դրամ անվանական արժեքով) մասնավորեցնել դասական աճուրդով:

Որոշմամբ սահմանվեց, որ ընկերության բաժնետոմսերի գնահատված արժեքը եւ մեկնարկային գինը 100 299,385 հազար դրամ է:

Սահմանվեց, որ Ընկերության պարտավորությունները 2019 թվականի հոկտեմբերի 1-ի դրությամբ կազմում են 9 975,6 հազ.դրամ:

Գույքի վաճառքի գնի 70 տոկոսն ուղղվելու է ՀՀ պետական բյուջե, իսկ 30 տոկոսը` համապատասխան համայնքի ֆոնդային բյուջե, ըստ գույքի գտնվելու վայրի:

Նշենք, որ Ընկերության գործունեության ոլորտն է եղել վերելակների տեղադրում եւ սպասարկում:

Ընկերությունը սկսած 2014թ. գործունեություն չի իրականացնում: Ընկերությունում հաշվառվում է երկու հաստիքային աշխատող՝ տնօրեն եւ գլխավոր հաշվապահ ½ դրույքաչափով:

«Երվերելակ» ՓԲԸ-ի շենք-շինությունների մակերեսը կազմում է՝ 3602.5 ք/մ, 207 գծամետր պարիսպ, իսկ զբաղեցրած հողատարածքը՝ 1,09426 հա:

Ընկերության բաժնետոմսերը ՀՀ կառավարության 14.06.2012թ. թիվ 746-Ա, 13.09.2013թ. թիվ 987-Ա եւ 30.03.2017թ. թիվ 324-Ա որոշումներով համապատասխանաբար 257 809 հազ. դրամ, 175 882 հազ. դրամ եւ 94 009 հազ.դրամ արժեքներով ներկայացվել են մասնավորեցման: Մասնավորեցումը չի կայացել գնորդ չլինելու պատճառով:

Ընկերության պարտավորությունները 2019 թվականի ապրիլի 1-ի դրությամբ կազմել են 9 194,8 հազ. դրամ. այդ թվում՝

1) կրեդիտորական պարտքեր աշխատավարձի եւ աշխատակիցների այլ կարճաժամկետ հատուցումների գծով՝ 4 308,9 հազ. դրամ.

2) կարճաժամկետ կրեդիտորական պարտք ՀՀ պետական բյուջեին՝ 3 394,0 հազ. դրամ.

3) այլ կրեդիտորական պարտքեր 1 491,9 հազ. դրամ:

Նախագծով առաջարկվում է կրկին անգամ ընկերության 100 տոկոս պետական բաժնեմասը ներկայացնել մասնավորեցման` աճուրդային եղանակով, բաժնետոմսերի վաճառքի մեկնարկային գին սահմանելով գնահատված արժեքը` 100 299 385 դրամ: