Ինձ հետ միասին ազատման դիմում են ներկայացրել ևս երկու աշխատակից. «Թափառող կենդանիների վնասազերծման կենտրոն» ՀՈԱԿ-ի փոխտնօրենն աշխատանքից ազատման մասին

Երեկ «Թափառող կենդանիների վնասազերծման կենտրոն» ՀՈԱԿ-ի փոխտնօրեն Հարութ Առաքելյանը ֆեյսբուքյան գրառմամբ տեղեկացրել էր, որ այլևս չի զբաղեցնելու տվյալ պաշտոնը, ինչպես նաև հավելել, որ որոշումն իրենն է եղել, որն ինքը ընդունել է շատ դժվար:

ArmDaily.am-ի այն հարցին, թե ինչն է եղել ազատման պատճառը, Առաքելյանը հարցին չպատասխանելով, ասաց, որ կան արժեքներ որոնք իրեն կարող են ստիպել գիշեր-ցերեկ քրտնաջան աշխատել ցանկալի արդյունքներ գրանցելու համար.«Միևնույն ժամանակ այդ արժեքների համար ես կարող եմ պարզապես դադարեցնել աշխատել, ինչը և արել եմ։ Ես իմ պատրաստակամությունն եմ հայտնել իմ նախկին աշխատակազմին նրանց կողքին մշտապես լինելու և աջակցելու: Հեղափոխական ազնիվ գաղափարների անդավաճան կրողն եմ ու առաջնորդվում եմ այդ գաղափարներով»:

Նկատառմանը, որ ամեն դեպքում ՀՈԱԿ-ը այդ հեղափոխական արժեքները չի՞ կրում, Առաքելյանը շրջանցելով հարցը, նշեց. «Հետհեղափոխական Հայաստանում բոլորը պետք է կրեն հեղափոխական ազնիվ ու նպատակային այն արժեքները, որոնց միջոցով հաջողություններ կգրանցենք բոլորս»:

Դիտարկմանը, որ իր հետ միասին ՀԱՈԿ-ի մի շարք աշխատակիցներ նույնպես դուրս են եկել աշխատանքից, Հարություն Առաքելյանը նշեց,«Դա չի համապատասխանում իրականությանը, Ինձ հետ միասին ազատման դիմում են ներկայացրել ևս երկու աշխատակից»:

Հարցին՝ արդեն որոշե՞լ է, թե որտեղ է անցնելու աշխատանքի, Առաքելյանը նշեց, որ այս պահին ազատ է և դեռ առաջարկներ չի ստացել.«Պատրաստակամ եմ ուժերիս ներածին չափով աշխատել գրեթե բոլոր ոլորտներում»: