Հայաստանում վերջին 2 ամիսներին բերման ենթարկված 44 անձինք Արա Վարդանյանի մտերիմներն են․ Լուսինե Սահակյան

Հայաստանում վերջին 2 ամսիներին բերման ենթարկված 44 անձինք «Հայաստան» համահայկական հիմնադրամի նախկին տնօրեն Արա Վարդանյանի մտերիմներն են։ Այս մասին NEWS.am-ի հետ զրույցում ասաց փաստաբան Լուսինե Սահակյանը։

«Վերջին 2 ամսվա ընթացքում մեր պրակտիկայում ունենք 44 բերման ենթարկելու դեպք։ Բերման են ենթարկել, թեեւ իմացել են, որ կասկածանք անգամ գոյություն չունի։ Միակ նպատակը եղել է ասֆալտին փռելը, տեսագրելը եւ դա վարչապետին տրամադրելը, որպեսզի վարչապետն էլ ֆեյսբուքյան իր պատին ներկայացնի այն որպես հանցաաշխարհի դեմ պայքար։ Այդ 44-ի դեպքում էլ չի հաստատվել կասկածանքը։ Ո՞ր ոստիկանն է ենթարկվել պատասխանատվության։ Դա արդեն իսկ վկայում է, որ ունեցել են հատուկ հրահանգ»,- նշեց Լուսինե Սահակյանը։

Փաստաբանի խոսքով՝ քաղաքացիներին բերման ենթարկելու համար ոստիկանությունը պետք է հիմնավոր փաստեր ունենա․

«Ինձ համար տարօրինակ է ոստիկանապետի հայտարարությունը, որովհետեւ այնպես չէ, որ յուրաքանչյուր դեպքում, երբ ոստիկանի մեջ ինչ-որ կասկածներ են ծագում, նա իրավունք ունի անձին բերման ենթարկելու։ Դրա համար որոշակի գործընթաց գոյություն ունի, դրա համար պետք են հիմնավոր փաստեր, որոնք պետք է ենթադրություն առաջացնեն, որ տվյալ անձը կասկածվի ինչ-որ հնարավոր հանցագործության կատարման մեջ եւ այդ դեպքում միայն անձը կարող է բերման ենթարկվել։ Այս պարագայում ոստիկանապետն ասում է՝ մենք բերում ենք, ստուգում ենք, եթե չի հաստատվում, բաց ենք թողում։ Եթե ոստիկանապետի դատողությամբ առաջնորդվենք, ապա կստացվի, որ յուրաքանչյուրիս ոստիկանները կարող են ասել, թե ծագել է ինչ-որ կասկած, կարող են բոլորիս բերման ենթարկել, հետո ասել՝ չհիմնավորվեցին մեր կասկածները, ուստի ազատ ենք արձակում»։

Լուսինե Սահակյանը շեշտեց, որ քաղաքացիներին այդ կերպ բերման ենթարկելն առաջացնում է ազատության իրավունքի սահմանափակման լուրջ խնդիր․

«Այսինքն՝ եթե անձի իրավունքը սահմանափակվում է, ապա դրա համար հիմքեր պետք է լինեն, որոնք, բնականաբար, չկան։ Այս բոլորին բերման ենթարկելու լրիվ այլ նպատակներ կային։ Հանցագործությամբ հանցավոր աշխարհի դեմ չեն պայքարում, տվյալ պարագայում պետությունն է այդ հանցաշխարհի դերը ստանձնում»։

Սահակյանը նկատեց, որ հանցագործությունները երկրում աճել են, քանի որ ոստիկանությունը լիարժեք չի աշխատում․ «Ոստիկանությունը պիտի ընդունի, որ լավ չի աշխատում։ Այդպիսով փորձում են ժողովրդի աչքին ցույց տան, թե իբր հանցավոր աշխարհի դեմ են պայքարում։ Ոստիկանությունն իր բուն գործառույթով զբաղվելու փոխարեն, զբաղված է ժողովրդի աչքին թոզ փչելով»։

Նշենք, որ հունվարի 28-ին, Քրեական ոստիկանության գլխավոր վարչության ծառայողները բերման էին ենթարկել «Ադեկվադ» կուսակցության հիմնադիրներ Արթուր Դանիելյանին, Կոնստանտին Տեր-Նակալյանին, անդամներ Գրիգոր Մինասյանին, Ազատ Ադամյանին, ՎԵՏՕ նախաձեռնության հիմնադիր Նարեկ Մալյանին, «Քաղաքացիական գիտակցություն» ՀԿ նախագահ Նարեկ Սամսոնյանին։ Նրանք բերման էին ենթարկվել ապօրինի զենք-զինամթերք պահելու կամ կրելու կասկածանքով։ Որոշ ժամանակ անց քաղաքացիներն ազատ էին արձակվել։