Նոր աղմկահարույց բացահայտումներ կլինեն․ Դավիթ Խաժակյան

Մարդկանց մոտ կոռուպցիան անձնական հարստացման հետ ասոցացվող երեւույթ է, բայց պետք է հասկանանք, որ կոռուպցիան նաեւ լինում է քաղաքական: Այս մասին այսօր՝ դեկտեմբերի 24-ին, լրագրողների հետ զրույցում ասաց Երեւանի ավագանու «Լույս» խմբակցության ղեկավար Դավիթ Խաժակյանը՝ անդրադառնալով GALLUP international association-ի Հայաստանում լիիրավ անդամ Էմ Փի Ջի ՍՊԸ-ի հրապարակած հարցման տվյալներին, որոնց համաձայն՝ Երեւանի քաղաքապետարանին գործարարների կողմից մեքենաների նվիրաբերումը երեւանցիների 43․4%-ը համարում է, որ «միանշանակ կոռուպցիա չէ», իսկ 22․8%-ը համարում է, որ «ավելի շուտ կոռուպցիա չէ»։

«Մարդկանց մոտ կոռուպցիան անձնական հարստացման հետ ասոցացվող երեւույթ է, բայց պետք է հասկանանք, որ կոռուպցիան նաեւ լինում է քաղաքական եւ դա միջազգային ձեւակերպում է։ Քաղաքական կոռուպցիայի մի մաս է այն, երբ պետական պաշտոնյան անցնում է լիազորությունները՝ հետապնդելով քաղաքական շահ։ Այս դեպքում քաղաքական շահը քաղաքապետի գործունեության որոշ ձախողումների շտկումն է։ «ԿամԱԶ»-ների գործարքի դեպքում եղել է դասական քաղաքական կոռուպցիա, որի միտումը սեփական կառավարչական ձախողումները քողարկելն է։ Մենք պետք է հասկանանք, որ նախկինում պայքարն անձնական հարստացման դեմ էր, բայց դա չի նշանակում, որ կոռուպցիայի մյուս տեսակները հիմա պետք է ընդունելի լինեն: Մարդկանց հետ պետք է աշխատանք տանենք, բացատրենք, որ սա եւս կոռուպցիայի տեսակ է։ Կոռուպցիան մի դեպքում լինում է պոզով, մյուս դեպքում՝ պարզապես ականջներով, այս դեպքում տրվում է շինթույլտվություն կամ ինքնակամ շինությունը օրինականացվում է, եւ դրա դիմաց քաղաքապետարանը ստանում է ինչ-որ գույք»,-նշեց նա:

Դավիթ Խաժակյանը նոր աղմկահարույց բացահայտումներ է խոստանում․ «Կարելի է պարզապես հետեւել գնումների առցանց ընթացակարգերին եւ տեսնել, թե ինչքան վիճահարույց հանգամանքներ, ինչքան փոխկապակցվածություններ կան, պարզապես դրանք 100 տոկոսանոց ապացուցելն է բարդանում եւ ժամանակատար լինում, որովհետեւ հիմա քաղաքային իշխանությունը ամեն ինչ հերքում է եւ պետք է կարողանալ ամեն ինչ փաստերով ապացուցել»։

Նա նշեց՝ իր ձեռքի տակ եղած փաստաթղթերը գործարքների մասին են, իրավական վիճահարույց հենք ունեն, իրավաբանները պետք է ուսումնասիրեն, որոնք պատրաստվում է փոխանցել ԱԺ քննիչ հանձնաժողովին։

Պաշտոնյաների պնդմանը, թե կարեւորը հարցը լուծվում է, ո՞ւմ է հետաքրքիր, թե ինչ ձեւով է դա արվում, Խաժակյանն ասաց, որ դա լավ տեղ չի տանում։