«Մարտի 1-ի» դեպքերից տուժած ընտանիքների նկատմամբ կիրառված չափորոշիչը պետք է կիրառեն նաև զոհված զինվորների մայրերի նկատմամբ

Ես մինչև վերջ գնալու եմ, որ մեր ծնողների խնդիրն իրական լուծումը ստանա: Այսօր Կառավարության շենքի դիմաց լրագրողների հետ զրույցում ասաց «Զինվորի Մայր» հ/կ նախագահ Մարգարիտա Խաչատրյանը:

«Մենք Կառավարություն էինք դիմել, որ այն չափորոշիչները, որոնցով «Մարտի 1-ի» դեպքերի հետևանքով տուժած ընտանիքներին 30 մլն դրան գումար են տրամադրել, նույն չափորոշիչը կիրառեին նաև զոհված զինվորների մայրերի նկատմամբ»,- ասաց նա և հավելեց, որ արդեն 4 ամիս է անցել, և պատասխան չկա:

Մարգարիտա Խաչատրյանը նշեց, որ այսօրվա ակցիայի ժամանակ ասել են, որ վարչապետը տեղում չէ: Նրա խոսքով՝ անարդար է, որ անտեսում են իրենց: «Մենք կարծում ենք, որ մեր պահանջն արդարացի է: Ֆինանսների նախարարությունը բավականին մեծ գումար տրամադրեց «Մարտի 1-ին» մահացածների հարազատներին և ոչ մի անգամ չի անդրադառնում զոհված զինվորների ընտանիքներին»,- ասաց նա:

Ըստ Մարգարիտա Խաչատրյանի՝ շատ վիրավորական է, ըստ նրա՝ ապագան զինվորներն են, բայց երկիրն ու կառավարությունը անտեսում է նրանց: Նրա խոսքով՝ եկել են արձանագրելու, որ պետք է ուշադիր լինեն իրենց երեխաների նկատմամբ, որովհետև, ըստ նրա, կորստից հետո կառավարությունն ու իշխանությունը նրանց անտեսում է:

Մարգարիտա Խաչատրյանի խոսքով՝ ֆինանսների նախարարությունը պետք է հրապարակի այն հրամանագիրը, որի համաձայն՝ «Մարտի 1-ի» զոհերի ընտանիքներին աջակցություն է հատկացվել, որ հասկանան, թե զոհված զինծառայողների ընտանիքներն ինչու չեն կարող օգտվել այդ հնարավորությունից: