Նախկինում դատվածը պատուհանից մտել է ներս, բացել ննջասենյակի պահարանը ու… ընկել ոստիկանի ձեռքը

Ոստիկանության Արտաշատի բաժնի ծառայողները տեղեկություններ են ստացել, որ Վերին Արտաշատի մի տնից գողություն է կատարվում:

Ոստիկանությունից հայտնում են, որ հոկտեմբերի 28-ին, ժամը 19.30-ին, Արտաշատի Իսակովի փողոցի բնակիչ, նախկինում դատված 37-ամյա տղամարդը տեխնիկական միջոցների գործադրմամբ Վերին Արտաշատի մի տան պատուհանը բացել ու մտել է ներս, հասցրել է բացել նաեւ ննջասենյակի պահարանը, սակայն իր կամքից անկախ՝ հանցագործությունն ավարտին չի հասցրել, քանի որ բռնվել է ոստիկանության Արտաշատի բաժնի ծառայողների կողմից:

Ժամը 20-ին նա բերման է ենթարկվել բաժին եւ ձերբակալվել:

Հանգամանքները պարզվում են:

Արարատի մարզային քննչական վարչությունում հարուցվել է քրեական գործ: