Մեծ Բրիտանիայում օրինականացվել է մարիխուանայի օգտագործումը բուժական նպատակով
Մեծ Բրիտանիայում նոյեմբերի 1-ից թույլատրվում է մարիխուանայի վաճառքն ու օգտագործումը բուժական նպատակով: Ինչպես հայտնում է DW.com-ը, թույլտվությունը տարածվում է Անգլիայի, Շոտլանդիայի և Ուելսի վրա:
Մարիխուանա գնել հնարավոր կլինի բացառապես դեղատոմսի առկայությամբ: Բժիշկները նման դեղատոմսեր կարող են դուրս գրել միայն որոշակի դեպքերում, երբ մյուս դեղամիջոցներն անարդյունավետ են:
Բրիտանիայում անվճար ինտերնետ-դասընթացներ կառաջարկվեն, որոնց միջոցով բժիշկներին կբացատրվի, թե որ դեպքերում է պետք դուրս գրել բուժական մարիխուանան: Բժիշկների թագավորական կոլեգիան խորհուրդ չի տալիս այն նշանակել որպես ցավազրկող միջոց:
Հիշեցնենք, որ երկու երկրում՝ Կանադայում և Ուրուգվայում, օրինականացվել է մարիխուանայի օգտագործումը ոչ միայն բուժական, այլև հանգստի նպատակներով:
Բուժական նպատակով կիրառվող մարիխուանան օրինականացվել է ԱՄՆ 30 նահանգում, ինչպես նաև 10 նահանգում հասանելի է մարիխուանայի ձեռքբերումը հանգստի նպատակով:
ՄԱԿ-ի տվյալներով՝ Մեծ Բրիտանիան հանդիսանում է բուժական և գիտական նպատակներով կանեփի խոշորագույն արտադրողն աշխարհում: