Խոշտանգում կատարելու մեջ մեղադրվող ոստիկանության Սևանի բաժնի երեք ծառայողներն ազատության մեջ են

Ոստիկանության Սևանի բաժնում քաղաքացուն խոշտանգում կատարելու կասկածանքով ձերբակալված երեք ոստիկաններն ազատ են արձակվել:

«Ոստիկանության ծառայողներին մեղադրանք է առաջադրվել ՀՀ ՔՕ-ի 309.1 հոդվածի 2-րդ մասի 4-րդ կետի հատկանիշներով՝ խոշտանգում»,- հայտնեցին ՀՔԾ-ից:

Հարցին, թե խափանման ի՞նչ միջոց է ընտրված, ՀՔԾ-ից հայտնեցին, որ նրանիցի մեկի նկատմամբ խափանման միջոց է ընտրվել ստորագրություն չհեռանալու մասին, իսկ երկու ծառայողի նկատմամբ ՀՔԾ քննիչը կալանքի միջնորդություն է ներկայացրել, որը դատարանը բավարարել է, այնուհետև դատարանը գրավի դիմաց նրանց ազատ է արձակել:

Հիշեցնենք, որ ՀՀ հատուկ քննչական ծառայությունում հարուցված քրեական գործի շրջանակում խոշտանգում կատարելու կասկածանքով ձերբակալվել են ՀՀ ոստիկանության Գեղարքունիքի մարզային վարչության Սևանի բաժնի քրեական հետախուզության բաժանմունքի պետն ու նույն բաժանմունքի երկու օպերլիազորները:

 Վերջիններս կասկածվում են ՀՀ ոստիկանության Սևանի բաժնում խմբի կազմում Ա. Մ.-ին խոշտանգելու մեջ: Նախաքննությունը շարունակվում է:

Հիշեցնենք նաև, որ ձերբակալված պաշտոնյաներին ազատ արձակելու պահանջով Սևանի բնակիչները հոկտեմբերի 20-ին փակել էին Երևան-Սևան ճանապարհը: Այնուհետև ձերբակալված ոստիկանների հարազատներին ընդունել էր նաև ՀՀ ոստիկանապետ Վալերիյ Օսիպյանը և վստահեցրել, որ բոլոր հարցերը կլուծվեն օրենքի շրջանակում: