Վրաստանը մեղադրում է Սաակաշվիլիին ավելի քան տասը տարի առաջ մեծահարուստ գործարարի դեմ մահափորձ կազմակերպելու մեջ
Վրաստանի իշխանությունները պնդում են, թե նախկին նախագահ Միխեիլ
Սաակաշվիլիին ավելի քան տասը տարի առաջ՝ իր ենթակաների հետ, մահափորձ է
կազմակերպել մեծահարուստ գործարար, ընդդիմադիր հայացքներով հայտնի Բադրի
Պատարկացիշվիլիի դեմ:
Որպես մեղադրանքի հիմք, երեկ Վրաստանի գլխավոր դատախազությունը
հրապարակեց դեռ 2007-ին գաղտնալսված մի շարք զրույցների ձայնագրություններ,
որտեղ, ըստ իրավապահների, Սահմանադրական անվտանգության դեպարտամենտի
աշխատակիցները՝ Սաակաշվիլիի հրահանգով, քննարկում են Պատարկացիշվիլիի դեմ
մահափորձի մանրամասները:
Դատախազությունը պնդում է, թե կասկածյալները կապ են հաստատել
Պատարկացիշվիլիի թիկնապահներից մեկի հետ, փորձել են տեղեկություններ ստանալ
միլիարդատեր գործարարին սպասարկող անձնակազմի վերաբերյալ և ծրագրել
այնպիսի սպանություն, որ «նրա մահը բնական թվա»:
Պատարկացիշվիլին մահացել է 2008-ին, 52 տարեկանում՝ Լոնդոնում գտնվող իր
առանձնատանը: Դատաբժշկական փորձաքննությամբ, վաղահաս մահվան պատճառ է
դարձել սրտի կաթվածը:
Մահվանից երկու տարի առաջ Պատարկացիշվիլին սկսել էր քննադատել Միխեիլ
Սաակաշվիլիին, առաջադրել էր իր թեկնածությունը Վրաստանի նախագահական
ընտրություններում՝ զբաղեցնելով երրորդ հորիզոնականը:
Սաակաշվիլին կտրականապես հերքում է այս մեղադրանքները: Երեկ երեկոյան,
ելույթ ունենալով ֆեյսբուքյան իր էջում, նախկին նախագահը պնդել է՝
ձայնագրությունները կեղծ են, մեղադրանքները՝ ապաշնորհ բեմադրություն:
«Ըստ այդ ձայնագրության, դեպարտամենտի երկու աշխատակիցներ, իրար հետ
խոսելով, ասում են՝ «Սաակաշվիլին տեղյակ է»։ 2007-ին որևէ պաշտոնյա, ինչ էլ
լիներ, ինձ անուն-ազգանունով չէր դիմի, կասեին՝ առաջինը, նախագահը, բայց
ոչ՝ Սաակշվիլին: Նրանք, ովքեր աշխատել են այդ համակարգում, կհավաստեն դա,
ինչպես նաև կասեն, որ իմ կողմից նման հրահանգ ընդհանրապես չէր կարող
լինել», - ասել է Վրաստանի նախկին նախագահը։
Սաակաշվիլին պնդել է՝ մեղադրանքը քաղաքական ենթատեքստ ունի,
իշխանություններն անհանգստացած են, քանի որ իր հիմնադրած կուսակցության
թեկնածուն օր-օրի ամրապնդում է դիրքերը հոկտեմբերի վերջին կայանալիք
նախագահական ընտրություններում:
«Զրույցի մասնակիցներն այժմ ձերբակալված են՝ պաշտոնեական
լիազորությունները չարաշահելու մեղադրանքով, չի բացառվում, որ
իշխանությունը ուղղակի ստիպել է նրանց նման զրույց բեմադրել», - ասել է
Սաակաշվիլին։
Վրաստանի նախկին նախագահի դեմ այս աղմկահարույց ձայնագրությունը
հրապարակվել է հոկտեմբերի 28-ին կայանալիք նախագահական ընտրությունների
շեմին: Դրանից երկու օր առաջ էլ ընդդիմադիրներն էին շրջանառության մեջ դրել
բանտում գաղտնալսված մի ձայնագրություն, որտեղ նախկին դատախազ Միրզա
Սուբելիանին մեղադրանքներ էր հնչեցնում գործող իշխանությունների հասցեին ու
պնդում՝ «Վրացական երազանք»-ին վարկաբեկող բազմաթիվ փաստեր ունի, բավական
է՝ դրանցից մեկ-երկուսը հրապարակի, և տեղում հազարավոր մարդիկ բողոքի
ցույցի դուրս կգան՝ պաշարելով Ռուսթավելի պողոտան:
Դեռևս գործող նախագահ Գեորգի Մարգվելաշվիլին, որ այս անգամ չի
առաջադրվել, նախօրեին քննադատել է նախընտրական արշավը, փաստելով՝ մեկը
մյուսին հաջորդող այդ գաղտնալսումները կարող են լուրջ հարված հասցնել
հանրության վստահությանը պետական ինստիտուտների նկատմամբ: