Ալեն Սիմոնյանը ցանկանում է Երևանի քաղաքապետ դառնալ

ԱԺ «Ելք» խմբակցության նորընտիր պատգամավոր Ալեն Սիմոնյանն իրեն տեսնում է օրենսդիր մարմնում և ՏԻՄ կառավարման համակարգում: Այս մասին այսօր ԱԺ-ում լրագրողների հետ զրույցում ասաց Ա.Սիմոնյանը:

«Ես որևէ հավակնությունների մասին չեմ ուզում խոսել, բայց կարող եմ ասել, որ ժամանակին, երբ «Ելքը» մասնակցել է Երևան քաղաքի ընտրություններին, ես եղել եմ քաղաքապետի թեկնածուներից մեկը և, այո՛, եթե նման պատասխանատվություն կուսակցությունը որոշի ինձ վրա դնել, ես, միգուցե, համաձայնեմ: Բայց այսօր ես ինձ շատ լավ եմ զգում Ազգային ժողովում` իմ մասնագիտության բերումով»,- ասաց Ա.Սիմոնյանը` ի պատասխան հարցի, թե պատրա՞ստ է զբաղեցնել Երևանի քաղաքապետի պաշտոնը:

Ըստ նրա` Տարոն Մարգարյանի հրաժարականը տրամաբանական է, որովհետև ՀՀԿ-ն և Տարոն Մարգարյանն այլևս չեն ներկայացնում հանրությանը, և չպետք է զբաղեցնի Երևան քաղաքի ավագանին. «Ես կարծում եմ, որ ամենաճիշտ լուծումը կլինի՝ շուտափույթ նաև կազմակերպել Երևան քաղաքի ավագանու ընտրություններ»:

Մանրամասները՝ 168.am-ի տեսանյութում