ՀՊՏՀ ֆինանսատնտեսագիտական քոլեջում դասադուլ և գործադուլ է, պահանջում են նախկին տնօրենի վերադարձը

Հայաստանի պետական տնտեսագիտական համալսարանի ֆինանսատնտեսագիտական քոլեջում այսօր ևս շարունակվում է դասադուլը և գործադուլը՝ նախկին տնօրեն Սերգեյ Խառատյանի վերադարձի պահանջով:

Այս մասին Tert.am-ին հայտնեց քոլեջի դասախոս Գրիգոր Ոսկերչյանը, ով հրաժարական է տվել նախկին տնօրենի վերադարձի պահանջով:

«Մեր տնօրենը 2 օր առաջ անհասկանալի պատճառներով հրաժարականի դիմում է ներկայացրել քոլեջի ղեկավարությանը, ինչի կապակցությամբ էլ ուսանողությունն ու բուհի աշխատողների մի մասը բոյկոտել են, ուսանողությունը ու մոտ 2 տասնյակ դասախոսներ 2 օր է՝ չեն մտնում քոլեջ: Այդ թվում ես աշխատանքից ազատման դիմում եմ ներկայացրել, որովհետև այս 11 ամսվա ընթացքում ինչ ինքը մեր տնօրենն է, մեր քոլեջը դարձել է Հայաստանի Հանրապետության թիվ 1 քոլեջը: Չնայած, երբ մտել ենք այստեղ, շատ խնդիրներ են եղել ՝սկսած կոռուպցիայից, վերջացրած շինարարական խնդիրներով:

Ահավոր վիճակ է եղել, քոլեջը 15 միլիոնի պարտք է ունեցել… Բայց հիմա թիվ 1 բուհն է: Ընդունելություն դեռ չի սկսվել, 300 տեղ ունենք, արդեն 600 մարդ դիմել է»,-մանրամասնեց Գրիգոր Ոսկերչյանը:

Նրա տեղեկացմամբ՝ այսօր քոլեջի փոխտնօրենի նշանակում է արվել: «Անհասկանալի է, թե ով, չենք ճանաչում, խոսակցություններ կան, թե ինչի համար է հեռացվել ինչ-որ համալսարանից»,-ասաց Գրիգոր Ոսկերչյանը ու ավելացրեց, որ բոյկոտում են ոչ թե փոխտնօրենի դեմ, այլ չեն հասկանում, «թե ինչ խաղեր են քոլեջում»։

Հարցին, թե եթե նախկին տնօրենը դիմում է գրել սեփական կամքով, ապա ո՞րն է իրենց պահանջը, վերջինս ասաց, որ այս ընթացքում խոսել է նրա հետ, ու վերջինս, տեսնելով, թե ինչ իրավիճակ է, ասել է, որ կվերադառնա:

Հարցին, թե արդյո՞ք նախկին տնօրենի հրաժարականի պահանջը պայմանավորված է քաղաքական իրավիճակի փոփոխությամբ, այսինքն՝ Սերգեյ Խառատյանը հանրապետական է ու հրաժարականի դիմում գրելու ինչ-որ պատճառներ ունի, քոլեջի դասախոսը պատասխանեց. «Ինքը հանրապետական է, ես ռադիկալ անկուսակցական եմ, քոլեջի երեխաները դասադուլների ժամանակ եղել են հրապարակում: Ես անձամբ իմ մեքենայով ճանապարհ եմ փակել, բայց մեր տնօրենը ոչ մեկին կամքին չի բռնացել»։