Առժամանակ դադարեցնել փողոցների փակումը. Նիկոլ Փաշինյանը հանդես է եկել կոչով (Տեսանյութ)
Առժամանակ դադարեցնել փողոցների փակումը. այս մասին հայտարարեց ԱԺ «Ելք» խմբակցության ղեկավար, «Քաղաքացիական պայմանագիր» կուսակցության նախագահ Նիկոլ Փաշինյանը՝ ֆեյսբուքյան ուղիղ եթերում:
«Չի կարելի թույլ տալ, որ ինչ-որ մարդիկ այս ամենից օգտվեն և սա վերածեն անվերահսկելի գործառույթի»,-ասաց նա:
Նիկոլ Փաշինյանն Արշակունյաց պողոտայում կանգ առավ և փողոցը փակողներին կոչ արեց առժամանակ դադարեցնել փողոցը փակելու գործընթացը:
Նա նշեց, որ մտահոգիչ տեղեկություն են ստացել և առաջին հերթին պետք է զբաղվեն քաղաքում կարգ ու կանոնի հաստատմամբ:
«Ես կոչ եմ անում միայն Երևանում առժամանակ դադարեցնել այս գործընթացները»,-ասաց նա և նաև կոչ արեց ինքնակազմակերպվել և առանց պետհամարանիշների մեքենաներին կանգնեցնել և հորդորել երթևեկել պետհամարանիշներով։
«Կան մարդիկ, որ իրավիճակից օգտվում են, և համոզված եմ՝ այդ մարդիկ անում են մեր հեղափոխությունը վարկաբեկելու համար»,-ասաց նա և նշեց, որ հիմա շարժվում է դեպի «Լամբադա» կամուրջ:
Նիկոլ Փաշինյանն ասաց, որ առանց պետհամարանիշների կամ փակված պետհամարանիշներով երթևեկելը նույնն է, ինչ դիմակներով երթերին, ցույցերին մասնակցելը: «Դա նույն սադրանքն է: Դուք հաղթել եք, և այս հաթանակը որևէ մեկը ձեր ձեռքից չպետք է կարողանա առնել»,-ասաց նա։