Իսրայելում ստուգվում է FlyDubai-ի ինքնաթիռի օդաչուի ինքնասպանության փորձի վարկածը

Իսրայելական աղբյուրները հայտնում են, որ շարունակվում է սեպտեմբերի 30-ին Դուբայից Թել Ավիվ ուղևորվող FlyDubai ավիաընկերության FZ1073 չվերթի արտակարգ միջադեպի հանգամանքների հետաքննությունը։ Ynet-ը և իսրայելական այլ լրատվամիջոցներ, հղում անելով իրազեկ աղբյուրներին, գրում են, որ այժմ ավելի է հաստատվում այն վարկածը, որ ինքնաթիռից առևանգման մասին ազդանշանի փոխանցման պատճառը օդաչուներից մեկի հնարավոր ինքնասպանության փորձն է եղել։

Միաժամանակ, հետաքննվում է այն տեսությունը, որ օդաչուն կարող էր մտադրություն ունենալ կործանել ինքնաթիռը ահաբեկչական հարձակման շրջանակներում։ Այս պահին որևէ վերջնական եզրակացություն չկա, և հետաքննությունը շարունակվում է։

Ավելի վաղ հաղորդվել էր, որ FZ1073 չվերթի օդաչուների միջև տեղի է ունեցել ծեծկռտուք, որից հետո ինքնաթիռը շեղվել է նախատեսված երթուղուց և արտակարգ վայրէջք կատարել Սաուդյան Արաբիայում։ Ավելի ուշ FlyDubai-ն հաստատել էր, որ ինքնաթիռը Սաուդյան Արաբիա է ուղղվել օդաչուների խցիկում տեղի ունեցած կոնֆլիկտից հետո։

Միջադեպի սկզբում ինքնաթիռից ստացված արտակարգ ազդանշանը մտահոգություն էր առաջացրել հնարավոր առևանգման վերաբերյալ։ Իսրայելի ռազմաօդային ուժերը օդ են բարձրացրել երկու կործանիչ, իսկ երկրի անվտանգության կառույցները սկսել էին ստուգել միջադեպի բոլոր հնարավոր պատճառները։

Իսրայելի օդանավակայանների վարչությունը, իր հերթին, հայտարարել է, որ երկրի օդային տարածքը շարունակում է բաց մնալ, իսկ օդանավակայաններն աշխատում են բնականոն ռեժիմով։

Օդաչուի ինքնասպանության փորձի և հնարավոր ահաբեկչական մտադրության մասին վարկածները այս պահին դեռ չեն հաստատվել և ներկայացվում են որպես հետաքննության ընթացքում ստուգվող տարբերակներ։