Վարշավան գաղտնազերծել է 2022 թվականից Ուկրաինա ուղարկված սպառազինության ծավալները

Ռուս- ուկրաինական պատերազմի սկսվելուց` 2022 թվականի փետրվարից Լեհաստանը Ուկրաինային աջակցություն է ցուցաբերում երեք ուղղությամբ՝ սպառազինության փոխանցում, ուկրաինացի զինծառայողների ուսուցում եւ լոգիստիկ աջակցություն՝ այսինքն՝ Յասենկայի հաբի սպասարկում, որի միջոցով Ուկրաինա են մուտք գործում ռազմական եւ հումանիտար օգնության բեռներ։ Ըստ BBC- ի` այս տվյալները ներկայացրել է Լեհաստանի պաշտպանության նախարար Վլադիսլավ Կոսինյակ-Կամիշը, ի պատասխան ընդդիմության մեղադրանքների։

Նախարարի խոսքով՝ 2022-2023 թվականներին Լեհաստանը Ուկրաինային փոխանցել է 3,9 միլիարդ դոլարի սպառազինություն։ Դրանց թվում եղել են, մասնավորապես, Տ-72, PT-91 եւ Leopard 2A4 տանկեր, ՄիԳ-29 ինքնաթիռներ, Մի-24 ուղղաթիռներ, զրահափոխադրիչներ եւ հետեւակի մարտական մեքենաներ, հրետանային համակարգեր ու դրանց արկեր։

2024 թվականից մինչեւ այսօր Վարշավան տրամադրել է 412 միլիոն դոլարի օգնություն։

Կոսինյակ-Կամիշի խոսքով՝ օգնության ծավալների նվազումը հիմնականում կապված է լեհական պաշարների սպառման հետ։ Սակայն Լեհաստանի պաշտպանության նախարարության տվյալներով՝ Ուկրաինան Վարշավայից ստացել է, մասնավորապես, տանկային եւ հրետանային զինամթերք, ավիառումբեր եւ հրթիռներ, այդ թվում՝ PAC-3 հրթիռներ Patriot համակարգերի համար։

«Լեհ հարկատուն գումար է ծախսում Ուկրաինային աջակցելու համար՝ հանուն սեփական անվտանգության։ Հենց դրա համար ենք մենք ՆԱՏՕ-ի կազմում, որպեսզի պատերազմը երբեք չգա այստեղ։ Եվ եթե պատմության մեջ այնպես է ստացվում, որ ինչ-որ մեկը պայքարում է նաեւ մեր ազատության համար, ապա, հակառակ բոլոր զգացմունքներին՝ իսկ դրանք կան, եւ ինձ նույնպես երբեմն նյարդայնացնում են իրավիճակները, երբ, օրինակ, տեսնում ենք թանկարժեք մեքենաներով երիտասարդ ուկրաինացիների, որոնք խախտում են օրենքը եւ մուտք են գործում Մորսկե Օկո [լիճ, որը գտնվում է ազգային պարկի տարածքում], չի կարելի կորցնել գլխավորը՝ լեհական պետության անվտանգությունը», - հայտարարել է Կոսինյակ-Կամիշը։

Քաղաքական գործիչը նաեւ զգուշացրել է Ուկրաինայում թշնամիներ փնտրելուց՝ ընդգծելով, որ Լեհաստանի իրական սպառնալիքը գալիս է Ռուսաստանից։

Միեւնույն ժամանակ, պաշտոնյան ընդգծել է, որ Ուկրաինային աջակցելը չի նշանակում հրաժարվել պատմական իրադարձությունների, այդ թվում՝ Վոլինյան ողբերգության վերաբերյալ բարդ հարցերի շուրջ երկխոսությունից։

(Վոլինյան ողբերգություն է կոչվում Երկրորդ աշխարհամարտում Արեւմտյան Ուկրաինայում Ուկրաինական ապստամբական բանակի կողմից ազգությամբ լեհերի զանգվածային կոտորածները. Խմբ)։

«Պատմական ճշմարտության համար պայքարը չի հակասում այս օգնությանը։ Ընդհակառակը՝ ընկերները պետք է միմյանց հետ անկեղծ խոսեն։ Պատմական ճշմարտությունը հիմք է ապագայում լավ համագործակցություն կառուցելու համար, եւ մենք պետք է այս հարցում վճռական լինենք», - ասել է նա։