ԱՄՆ Սենատը կրկին առաջ է քաշել Իրանի դեմ պատերազմը դադարեցնելու բանաձևը

ԱՄՆ Սենատում հիմնական քվեարկությունից առաջ տեղի է ունեցել այն բանաձևի ընթացակարգային քվեարկությունը, որը ԱՄՆ նախագահ Դոնալդ Թրամփից պահանջում է կամ դադարեցնել Իրանի դեմ բոլոր ռազմական գործողությունները, կամ ուժ կիրառելու համար ստանալ Կոնգրեսի պաշտոնական թույլտվությունը։

Բանաձևի հետագա ընթացքին Կոնգրեսի վերին պալատում աջակցել է 50 սենատոր՝ հիմնականում դեմոկրատներ և չորս հանրապետական, 47-ը դեմ են եղել՝ հիմնականում հանրապետականներ և մեկ դեմոկրատ։ CNN-ի տվյալներով՝ երեք հանրապետական ​​սենատոր բացակայել է քվեարկությունից` իրենց քարոզարշավի պատճառով։

Այս տարվա սկզբին հանրապետականները խոչընդոտել են այդ բանաձևը Սենատում առաջ մղելու նախորդ յոթ փորձը։

1973 թվականի «Պատերազմական լիազորությունների մասին» օրենքի համաձայն՝ ԱՄՆ նախագահը կարող է ռազմական գործողություններ իրականացնել առանց Կոնգրեսի հաստատման ընդամենը 60 օրվա ընթացքում։ Այդ ժամանակահատվածից հետո նախագահը պետք է կամ դադարեցնի պատերազմը, կամ Կոնգրեսից պաշտոնական թույլտվություն ստանա ռազմական ուժ կիրառելու համար։

2026 թվականի մայիսի 1-ին, երբ լրացավ Իրանի դեմ ռազմական գործողությունների 60-օրյա ժամկետը, Դոնալդ Թրամփը Կոնգրեսին ծանուցեց այդ երկրի դեմ «պատերազմի ավարտի» մասին, սակայն փաստացի Միացյալ Նահանգները շարունակում է շրջափակել իրանական նավահանգիստները և հարվածել իրանական նավերին, նշում Է Reuters-ը։

CNN-ն էլ հաղորդում է, որ օրենքի ընդունման դեպքում Թրամփը պարտավոր կլինի Կոնգրեսի հետ համաձայնեցնել Իրանում ցանկացած ապագա ռազմական գործողություն։