Իսրայելի զինվորականները Իրաքում երկրորդ գաղտնի բազան են շահագործել. NYT

The New York Times-ը հայտնում է, որ Իսրայելի զինվորականները երկու «գաղտնի» հենակետ են շահագործել Իրաքի արևմտյան անապատում և սպանել են մի հովվի ու մի զինվորի՝ Ալ-Նուխայբ քաղաքի մոտ գտնվող օբյեկտներից մեկը թաքցնելու նպատակով։ Թերթը նշել է, որ իրաքցի հովիվը 29-ամյա Ավադ ալ-Շամարին էր։

Վկայակոչելով տարածաշրջանային պաշտոնյաներին՝ NYT-ը հայտնել է, որ բազան գոյություն է ունեցել դեռևս Իրանի դեմ ԱՄՆ-Իսրայել «ներկայիս» պատերազմից առաջ և օգտագործվել է անցյալ տարվա հունիսին այդ երկրի դեմ մղված 12-օրյա պատերազմի ժամանակ։ Հենակետն Իսրայելի կողմից օգտագործվել է օդային աջակցության, վառելիքի լիցքավորման և բժշկական օգնություն ցուցաբերելու համար։

NYT-ը հայտնել է, որ ԱՄՆ-ն գիտեր իսրայելական բազայի մասին, ինչը, ամենայն հավանականությամբ, նշանակում է, որ Վաշինգտոնն Իրաքից թաքցրել է իր տարածքում թշնամական ուժերի գտնվելու փաստը։ Պարբերականի փոխանցմամբ՝ այս բազան առանձին է եղել մեկ այլ հենակետից, որի մասին ավելի վաղ հայտնել էր The Wall Street Journal-ը։ Այդ մյուս հենակետը կառուցվել էր Իրանի դեմ ԱՄՆ-Իսրայել պատերազմի սկսվելուց անմիջապես առաջ, որտեղ տեղակայված են եղել հատուկ նշանակության ջոկատներ, և այն ծառայել է որպես լոգիստիկ հանգույց Իսրայելի ռազմաօդային ուժերի համար։

Իրաքի կողմից այս զեկույցի վերաբերյալ անմիջապես ոչ մի մեկնաբանություն չի արվել։ Սակայն ավելի վաղ՝ կիրակի օրը, Իրաքի զինված ուժերի գլխավոր հրամանատարի խոսնակ Սաբահ ալ-Նումանը հայտարարել էր, որ երկիրը թույլ չի տա, որ իր տարածքն օգտագործվի որպես «հարթակ» այլ երկրների վրա հարձակումներ գործելու համար։