Իրանի հրամանատարությունը ԱՄՆ-ին մեղադրել է հրադադարի ռեժիմը խախտելու մեջ

Իրանի ռազմական հրամանատարությունը ԱՄՆ-ին մեղադրել է հրադադարի ռեժիմը խախտելու մեջ եւ հայտարարել, որ ամերիկյան կողմը հարված է հասցրել Հորմուզի նեղուց շարժվող նավթատարին։ Իրանական պետական IRIB հեռարձակողի տելեգրամյան ալիքում հրամանատարության ներկայացուցիչը նշել է,  որ եւս մեկ նավ, որը մուտք էր գործում նեղուց՝ Արաբական Միացյալ Էմիրությունների Ֆուջայրա նավահանգստի դիմաց, նույնպես ենթարկվել է հարվածի։

Օդային հարվածներ են հասցվել Բենդար-Խեմիրի, Սիրիկի եւ Ղեշմ կղզու ափամերձ շրջանների երկայնքով։ Ըստ հայտարարության` Իրանի զինված ուժերը «անմիջապես արձագանքել են»՝ հարձակվելով ամերիկյան ռազմական նավերի վրա եւ դրանց հասցնելով «զգալի վնաս»։

Իր հերթին ԱՄՆ-ի Կենտրոնական հրամանատարությունը՝ CENTCOM, հայտնել է, որ ամերիկյան ուժերը «կասեցրել են Իրանի չհրահրված հարձակումները եւ պատասխան հարվածներ հասցրել ինքնապաշտպանության շրջանակում, երբ ԱՄՆ ռազմածովային ուժերի հրթիռային ականակիրներն անցնում էին Հորմուզի նեղուցով դեպի Օմանի ծոց», հայտնում է BBC-ին։

«ԱՄՆ-ի Կենտրոնական հրամանատարությունը ոչնչացրել է մոտեցող սպառնալիքները եւ հարվածներ հասցրել Իրանի զինված ուժերի օբյեկտներին, որոնք պատասխանատու էին ԱՄՆ ուժերի վրա հարձակումների համար, այդ թվում՝ հրթիռների եւ անօդաչուների արձակման դիրքերին, հրամանատարական եւ վերահսկման կետերին, ինչպես նաեւ հետախուզության, դիտարկման եւ հետախուզական տվյալների հավաքման հանգույցներին։ CENTCOM-ը չի ձգտում էսկալացիայի, սակայն շարունակում է մնալ տեղակայված եւ պատրաստ՝ պաշտպանելու ամերիկյան ուժերը», ասված է հայտարարության մեջ։

Իր հերթին ԱՄՆ նախագահ Դոնալդ Թրամփը ABC News հեռուստակայանին ասել է, որ հրդադադարն ուժի մեջ է։

Ավելի ուշ նա Truth Social սոցիալական ցանցում գրել է, որ իրանցի հարձակվողներին հասցվել է «մեծ վնաս», եւ բազմաթիվ փոքր նավակներ ամբողջությամբ ոչնչացվել են։ «Այդ նավակները արագ եւ արդյունավետ կերպով խորտակվել են ծովում։ Մեր ականակիրների ուղղությամբ հրթիռներ են արձակվել, եւ դրանք հեշտությամբ խոցվել են։ Նույն կերպ հայտնվել են անօդաչուները, եւ դրանք օդում անմիջապես այրվել են»,- գրել է նա։

Թրամփը նաեւ հայտարարել է, որ ԱՄՆ-ը շարունակում է բանակցությունները Իրանի հետ՝ երկու երկրների միջեւ կրակի նոր փոխանակումից հետո։ «Բանակցությունները շատ լավ են ընթանում, բայց նրանք պետք է հասկանան․ եթե [գործարքը] չստորագրվի, դա կարող է շատ ցավոտ լինել նրանց համար։ Նրանց համար շատ ցավոտ կլինի… Նրանք ցանկանում են ստորագրել նույնիսկ ավելի շատ, քան` ես»,- Թրամփի խոսքերն է մեջբերում Reuters- ը։