ԱՄՆ-ը իրանական դրոշի ներքո նավարկող երեք տանկեր է առգրավել

ԱՄՆ զինված ուժերը Ասիայի ջրային տարածքներում առգրավել են իրանական դրոշի ներքո նավարկող առնվազն երեք տանկեր և փոխել դրանց ընթացքը՝ հեռացնելով Հնդկաստանի, Մալայզիայի և Շրի Լանկայի մերձակայքում գտնվող դիրքերից. գրում է Reuters-ը․

Վաշինգտոնը խստացնում է սահմանափակումները Իրանի ծովային առևտրի նկատմամբ, մինչդեռ Իրանը կրակ է բացել նավերի ուղղությամբ՝ փորձելով կանխել դրանց անցումը Հորմուզի նեղուցով։ ԱՄՆ-ի և Իսրայելի կողմից Իրանի դեմ ռազմական գործողությունների սկսվելուց գրեթե երկու ամիս անց, անկայուն հրադադարի պայմաններում խաղաղ բանակցությունների վերսկսման նշանները շարունակում են սակավ մնալ։

Հորմուզի նեղուցի փակումը խաթարել է համաշխարհային նավթի և գազի մատակարարումների շուրջ մեկ հինգերորդը՝ առաջացնելով էներգետիկ լուրջ ճգնաժամ։ Վերջին օրերին ամերիկյան ուժերը կալանել են իրանական մեկ բեռնատար նավ և մեկ նավթատար տանկեր։ Իրանը, իր հերթին, հայտարարել է, որ չորեքշաբթի օրը կալանել է երկու կոնտեյներատար նավ, որոնք փորձում էին լքել Պարսից ծոցը Հորմուզի նեղուցով։ Սա պատերազմի սկսվելուց ի վեր Իրանի կողմից իրականացված նավերի առաջին կալանման դեպքն է։

ԱՄՆ զինվորականները դեռևս չեն արձագանքել միջադեպերի վերաբերյալ մեկնաբանություն ստանալու հարցումներին։

Կալանված նավերից մեկը իրանական դրոշով նավարկող «Deep Sea» սուպերտանկերն է, որը մասամբ բեռնված էր հում նավթով։ MarineTraffic հարթակի տվյալներով՝ այն վերջին անգամ գրանցվել էր Մալայզիայի ափերի մոտ մեկ շաբաթ առաջ։

Կալանվել է նաև ավելի փոքր «Sevin» տանկերը, որի առավելագույն տարողությունը կազմում է 1 միլիոն բարել, և որը բեռնված էր մոտ 65 տոկոսով։ Այն վերջին անգամ նկատվել էր Մալայզիայի ափերի մոտ մեկ ամիս առաջ։

Երրորդը իրանական «Dorena» սուպերտանկերն է, որը լիովին բեռնված էր շուրջ 2 միլիոն բարել հում նավթով։ Այն վերջին անգամ գրանցվել էր Հարավային Հնդկաստանի ափերի մոտ երեք օր առաջ։