ԱՄՆ սենատորները նախազգուշացնում են Meta-ին և Alphabet-ին. Մոսկվան փորձում է միջամտել Հայաստանի ընտրություններին

ԱՄՆ սենատորներ Ջին Շահինը և Թոմ Թիլիսը պաշտոնական նամակներ են հղել Meta և Alphabet ընկերություններին՝ զգուշացնելով Հայաստանի 2026 թվականի խորհրդարանական ընտրություններին Ռուսաստանի հնարավոր միջամտության մասին։ Սենատորները շեշտել են, որ ռուսական կողմը կիրառում է Մոլդովայում փորձարկված մանիպուլյատիվ մեթոդները՝ օգտագործելով սոցիալական հարթակները և ռուս-հայկական օլիգարխների հետ կապված ցանցերը։

Նամակում ընդգծվում է, որ այս ընտրությունները վճռորոշ են տարածաշրջանային խաղաղության և «Թրամփի երթուղի» նախագծի համար, ուստի տեխնոլոգիական հսկաներից պահանջվում է բավարար ռեսուրսներ հատկացնել ապատեղեկատվությունը կանխելու և հայ ժողովրդի ազատ կամարտահայտումն ապահովելու համար։

Քանի որ նշված հարթակները գտնվում են ԱՄՆ իրավասության ներքո, սենատորները համարում են, որ ընկերությունները կրկնակի պատասխանատվություն են կրում՝ թույլ չտալու համար, որ օտարերկրյա տերությունները միջամտեն Հայաստանի ինքնիշխան որոշումներին։

«Մենք չենք կարող աչք փակել, երբ տեսնում ենք, թե ինչպես է օտարերկրյա տերությունը փորձում իր կամքը պարտադրել հայ ժողովրդին»,- ասված է սենատորների նամակում։ Նրանք հորդորել են տեխնոլոգիական հսկաներին հատկացնել բավարար ռեսուրսներ՝ ապահովելու համար, որ Հայաստանի ընտրությունները լինեն ազատ և արդար։

radar armenia