Եվրամիության հետ  գործակցությունը Երևանը դիտարկում է որպես երկարաժամկետ ռազմավարություն

Եվրամիության հետ  գործակցությունը Երևանը դիտարկում է որպես երկարաժամկետ ռազմավարություն՝ միաժամանակ պահպանելով արտաքին քաղաքական բալանսը՝ շեշտել է Փաշինյանը Հայաստան-ԵՄ քաղաքացիական հասարակության պլատֆորմի 8-րդ երկկողմ հանդիպմանը։ Եթե անգամ Հայաստանը չդառնա ԵՄ անդամ, միևնույն է՝ մենք շահելու ենք այս քայլերից՝ ասել է վարչապետը։ ԵՄ ինտեգրման քայլերից են խոսել նաև պետական այլ պատասխանատուներ։

Եվրամիության հետ գործակցությունը ոչ թե ձևական գործընթաց է, այլ բարեփոխումների իրական գործիք, որով պետք է խնդիրների լուծման արդյունավետ ուղիներ գտնենք՝ ասում է Փաշինյանը եվրոպացի և հայ պաշտոնյաների հետ հանդիպմանը։

«Առանցքային նպատակն այն է, որ մենք ունենանք որոշակի մեխանիզմներ հնարավոր թույլ տրված սխալներն ուղղելու»։ 

Փաշինյանի խոսքով՝ անդամակցության հարցը կախված է ԵՄ քաղաքական որոշումներից, ու եթե նույնիսկ ԵՄ-ն որոշի չընդլայնվել ու Հայաստանը չդառնա ԵՄ անդամ, Հայաստանը արդեն իսկ շահում է՝ բարեփոխումների և եվրոպական չափանիշներին համապատասխանելով։
Այս համատեքստում արդարադատության նախարար Սրբուհի Գալյանը շեշտում էCEPPA-ի՝ Համապարփակ և ընդլայնված գործընկերության համաձայնագրւ ուղղությամբ արվող քայլերը։ Դրանք ընդլայնվեցին՝ նախորդ տարեվերջին Բրյուսելում ԵՄ-Հայաստան ռազմավարական գործակցության նոր փաստաթղթերով։

«Մենք ամեն ինչ գիտենք, թե ինչ պետք է անի մեր պետությունը, որ, ի վերջո, համապատասխանենք համաձայնագրին և կատարենք մեր առջև դրված խնդիրը։ Մենք այն միտքն  ունենք, որ տնային աշխատանքը, որ պետք է կատարվի, բազմասպեկտ է, բազմաշերտ է և ունենք հանձնարարություն՝դա օր առաջ կատարելու, և այս նոր ճանապարհային քարտեզը տալու է մեզ նոր հնարավորություններ՝ ավելի արդյունավետ, արագ և որակյալ աշխատանք կատարելու»։

Ինչ կտան ԵՄ-ին ուղղված քայլերը շարքային քաղաքացուն։ ՆԳ նախարար Արփինե Սարգսյանը  վիզաների ազատականացումն է շեշտում, որն ավելի ու ավելի իրատեսական է համարում՝ հիմք ընդունելով եվրոպացի պաշտոնյաների մեսիջներն էլ։  

«Ես ուզում եմ վերահաստատել, որ կառավարությունը ունի շատ հստակ հանձնառություն. վիզաների ազատականացման երկխոսության շրջանակներում գործողությունների ծրագիրը լիարժեքորեն համընկնում է կառավարության այս պահի դրությամբ ունեցած  ռեֆորմային օրակարգի հետ, և սա է նաև վստահություն տալիս մեզ՝ պնդելու, որ վիզաների ազատականացումը իրատեսական է։ Կառավարության կողմից ձեռնարկված քայլերը և նաև ընթացքի մեջ գտնվող քայլերը՝ պատշաճ ժամկետում իրականացվելու պայմաններում, և դրանք պիտի՛ իրականացվեն պատշաճ ժամկետներում»։      

Դիվանագիտական մակարդակում միայն վերջին մի քանի օրում մի քանի կարևոր հանդիպում է եղել։ Արտգործնախարար Արարատ Միրզոյանը Բրյուսել է մեկնել ԵՄ արտաքին գործերի և անվտանգության քաղաքականության բարձր ներկայացուցիչ Կայա Կալլասի հետ հանդիպման, նախորդիվ հանդիպել պաշտպանության և տիեզերքի հարցերով ԵՄ հանձնակատար Անդրիուս Կուբիլիուսի հետ։  

Երևանի եվրոպական մերձեցումը, սակայն, Մոսկվայի կողմից առանց արձագանքի չի մնում։ Կրեմլում պաշտոնապես հայտարարվել է, որ Հայաստանը չի կարող միաժամանակ լինել և՛ ԵԱՏՄ-ի, և՛ Եվրոպական միության լիիրավ անդամ։ ՌԴ նախագահն այդպիսով փաստացի մատնանշել է ինտեգրացիոն 2 ուղղությունների անհամատեղելիությունը։

Պաշտոնական Երևանն արձագանքում է՝ կրկին հիշեցնելով բազմավեկտոր  քաղաքականության իր մոտեցումը։ Այս համատեքստում կարելի է դիտարկել վարչապետի այն հայտարարությունը, որի մասին արդեն խոսեցինք, այն է՝ եթե նույնիսկ ԵՄ-ն որոշի չընդլայնվել, ու Հայաստանը չդառնա ԵՄ անդամ, Հայաստանն արդեն իսկ շահում է արվող բարեփոխումներից։

Նույն այս համատեքստում Երևանը հաստատեց իր մասնակցությունն Անկախ պետությունների համագործակցության արտաքին գործերի նախարարների խորհրդի առաջիկա նիստին։ Արտաքին գործերի փոխնախարար Մնացական Սաֆարյանն այս նպատակով ապրիլի 17-ին կլինի Մոսկվայում։  ԱՊՀ գործադիր կոմիտեն հայտարարել է, որ նիստում նախարարները որոշումներ կկայացնեն միջազգային օրակարգի և ԱՊՀ գործընկերության ավելի լայն շրջանակի հրատապ հարցերով։