Վենսը մանրամասներ է հաղորդել Նեթանյահուին

Իսրայելի վարչապետ Բենիամին Նեթանյահուն հայտարարել է, որ հեռախոսազրույց է ունեցել ԱՄՆ փոխնախագահ Ջեյ Դի Վենսի հետ, ով մանրամասն տեղեկություններ է փոխանցել Իրանի շուրջ ընթացող բանակցությունների վերաբերյալ։ Ըստ Իսրայելի վարչապետի՝ Վաշինգտոնի համար առանցքային խնդիրը մնում է Իրանից ամբողջ հարստացված միջուկային նյութի հեռացումը և առաջիկա տարիների կամ, նույնիսկ, տասնամյակների ընթացքում հարստացման գործընթացի բացառումը։

Նեթանյահուն շեշտել է, որ քանի որ Իրանը խախտել է սահմանված կանոնները, նախագահ Թրամփը որոշում է կայացրել կիրառել ծովային շրջափակում։ Իսրայելի կառավարության ղեկավարը հայտնել է իր լիակատար աջակցությունն ԱՄՆ-ի այս վճռական դիրքորոշմանը։

Նրա խոսքով՝ ամերիկյան վարչակազմն ամենօրյա ռեժիմով տեղեկացնում է Իսրայելին զարգացումների մասին, ինչը վկայում է երկու դաշնակիցների միջև սերտ համագործակցության մասին՝ ընդդեմ Իրանի միջուկային հավակնությունների։