Մենք տեսնում ենք ձեզ, տեսնում ենք ձեր գործունեությունը մեր մալուխների և խողովակաշարերի շուրջ

Մեծ Բրիտանիայի կառավարությունը Ռուսաստանին մեղադրել է բրիտանական ստորջրյա մալուխների և խողովակաշարերի դեմ «գաղտնի գործողություն» իրականացնելու փորձի համար։ Այդ մասին հայտարարել է պաշտպանության նախարար Ջոն Հիլին՝ Լոնդոնում կայացած մամուլի ասուլիսում։

Ռուսաստանը, «Մերձավոր Արևելքում տեղի ունեցող իրադարձությունների քողի տակ», Մեծ Բրիտանիայի ափ և հարակից ջրեր է ուղարկել երեք սուզանավ՝ «չարամիտ գործունեություն» իրականացնելու նպատակով, հաղորդում է DW-ն։

Պարբերականը տեղեկացնում է, որ Մեծ Բրիտանիան ՆԱՏՕ-ի դաշնակիցների, այդ թվում՝ Նորվեգիայի հետ, Հյուսիսային Ատլանտյան օվկիանոսի միջազգային ջրերում հայտնաբերել է ռուսական երեք սուզանավ և դրանց նկատմամբ իրականացրել 24-ժամյա հսկողություն: Հասկանալով, որ հսկողության տակ են և իրենց «չարամիտ գործունեությունն» այլևս գաղտնիք չէ, ռուսական սուզանավերը հեռացել են տարածքից:

Դիմելով Ռուսաստանի նախագահ Վլադիմիր Պուտինին՝ Մեծ Բրիտանիայի պաշտպանության նախարարը հայտարարել է. «Մենք տեսնում ենք ձեզ, տեսնում ենք ձեր գործունեությունը մեր մալուխների և խողովակաշարերի շուրջ։ Դուք պետք է իմանաք, որ վնաս հասցնելու ցանկացած փորձ անպատիժ չի մնա և կհանգեցնի լուրջ հետևանքների»։

Ռուսաստանը հերքել է ռուսական սուզանավերի սպառնալիքի մասին Մեծ Բրիտանիայի մեղադրանքները: ՌԴ դեսպանատունը հայտարարել է, որ Մոսկվան «չի սպառնում Թագավորության ստորջրյա ենթակառուցվածքին» և «այդ հարցում ագրեսիվ հռետորաբանություն չի օգտագործում»,- հաղորդում Է ՏԱՍՍ գործակալությունը: