Պատերազմը դադարեցնելու համար Վաշինգտոնը պատրաստ է ճնշում գործադրել Ուկրաինայի վրա. Զելենսկի

Վոլոդիմիր Զելենսկին հայտարարել է, որ պատերազմը դադարեցնելու համար ԱՄՆ նախագահ Դոնալդ Թրամփը և նրա թիմը պատրաստ են ճնշում գործադրել Ուկրաինայի վրա՝ պահանջելով գնալ տարածքային զիջումների։ Պետքարտուղարությունը հերքել է այս պնդումը:

Ուկրաինայի նախագահը տեղեկացրել է, որ վերջերս Մայամիում Սպիտակ տան հատուկ բանագնացներ Սթիվ Ուիթքոֆի և Ջարեդ Քուշների հետ բանակցությունները ոչ մի արդյունք չեն տվել։ «Ես վստահ եմ, որ նախագահ Թրամփը և նրա թիմը ցանկանում են դադարեցնել պատերազմը։ Բայց մենք չենք պատրաստվում հատուցել դրա համար»,- շեշտել է Զելենսկին։

Ավելի վաղ Վոլոդիմիր Զելենսկին, մեկնաբանելով ռուս-ուկրաինական բանակցություններում դադարը, հայտարարել էր, որ դիվանագիտական ջանքերը դեռևս փակուղում չեն, իսկ Վաշինգտոնի միջնորդությամբ եռակողմ հանդիպումը հետաձգվում է, քանի որ ԱՄՆ-ը այժմ կենտրոնացած է Իրանի վրա։ Ուկրաինայի նախագահը պատրաստակամություն էր հայտնել շարունակելու բանակցային գործընթացը ցանկացած ձևաչափով: Ռուսաստանի ԱԳՆ-ից էլ նշել են, որ Կիևի թիմի հետ հանդիպման ամսաթվերը դեռևս հայտնի չեն, սակայն Մոսկվան պատրաստ է դրան: