Մոնղոլիան նոր վարչապետ կունենա

Մոնղոլիայում շարունակվող քաղաքական ճգնաժամի ֆոնին իշխող Մոնղոլական ժողովրդական կուսակցությունը նոր վարչապետի թեկնածու է առաջադրել՝ փոխարինելու հրաժարական տված կառավարության ղեկավարին։ Թեկնածուն խորհրդարանի խոսնակ և կուսակցության ղեկավար Ուչրալ Նյամ-Օսորն է, որը դիտարկվում է որպես կոմպրոմիսային գործիչ տարբեր ներհամակարգային խմբավորումների միջև։

Նախկին վարչապետ Գոմբոժավ Զանդանշատարը պաշտոնից հեռացել է ընդամենը ինը ամիս աշխատելուց հետո՝ կոռուպցիոն սկանդալի և ընդդիմության բոյկոտի պայմաններում։ Ընդդիմադիր Դեմոկրատական կուսակցությունը հրաժարվել էր մասնակցել խորհրդարանի աշխատանքներին՝ իշխանության կենտրոնացման վերաբերյալ մտահոգությունների պատճառով։

Քաղաքական այս զարգացումները խորացնում են հասարակական անվստահությունը իշխանությունների նկատմամբ՝ հատկապես այն պայմաններում, երբ Մոնղոլիան դեռևս համարվում է երիտասարդ ժողովրդավարություն և հաճախ քննադատվում է կոռուպցիայի ու էլիտաների շահերին ծառայող կառավարման համակարգի համար։ Անկայունությունը նաև բացասաբար է ազդում տնտեսության վրա՝ վախեցնելով արտաքին ներդրողներին, հատկապես հանքարդյունաբերության ոլորտում, որը երկրի տնտեսության հիմնական հենասյունն է։