Ոչ ոք չի կարող շանտաժի ենթարկել Եվրոպական խորհրդին

ԵՄ առաջնորդները չկարողացան համոզել Հունգարիային ապաշրջափակելու Ուկրաինային տրամադրվելիք 90 մլրդ եվրոյի վարկը։ Առաջնորդները  Եվրոպական հանձնաժողովին խնդրել են վարկը տրամադրելու  հնարավորություն գտնել, հայտնում է Reuters-ը։

Գերմանիայի կանցլեր Ֆրիդրիխ Մերցը իր հունգար պաշտոնակցի` Վիկտոր Օրբանի գործողություններն անվանել է «ոչ լոյալության աննախադեպ լուրջ գործողություն»։ «Սա անհետեւանք չի մնա»,- ասել է նա լրագրողներին Բրյուսելում կայացած ԵՄ առաջնորդների գագաթնաժողովից հետո։

Եվրոպական խորհրդի նախագահ Անտոնիու Կոշտայի խոսքով՝ ԵՄ առաջնորդները դատապարտել են Հունգարիայի վարքագիծը։ «Պայմանավորվածությունը պայմանավորվածություն է, բոլոր առաջնորդները պետք է պահեն իրենց խոսքը։ Ոչ ոք չի կարող շանտաժի ենթարկել Եվրոպական խորհրդին»,- նշել է նա։

Եվրոպական հանձնաժողովի նախագահ Ուրսուլա ֆոն դեր Լայենը խոստացել է, որ Կիեւը «այս կամ այն կերպ» կստանա խոստացված միջոցները։

90 մլրդ եվրոյի վարկը համաձայնեցվել էր դեռեւս 2025 թվականին, սակայն Հունգարիան արդեն մի քանի ամիս է արգելափակում է դրա տրամադրման որոշումը։ Որոշումը կարող է ընդունվել միայն ԵՄ բոլոր անդամ երկրների համաձայնությամբ։

Հունվարին դադարեցվել է Ուկրաինայի տարածքով անցնող «Դրուժբա» նավթամուղի աշխատանքը։ Դրանով Հունգարիան ռուսական նավթ է ստանում։ Կիեւը նավթամուղի աշխատանքի դադարեցումը բացատրում է ռուսական հարձակման հետեւանքով խողովակի վնասվելով։ Օրբանը պնդում է, որ կշարունակի արգելափակել Կիեւին ֆինանսական աջակցությունը, քանի դեռ «Դրուժբա»-ի աշխատանքը չի վերականգնվել։