Թեհրանի կողմից ԱՄՆ-ի վրա հարձակման վերաբերյալ որևէ հավաստի հետախուզական տվյալ չի եղել

ԱՄՆ Հակաահաբեկչական ազգային կենտրոնի նախկին տնօրեն Ջո Քենթը, ով օրերս սկանդալային կերպով հրաժարական տվեց իր պաշտոնից, Թաքեր Կառլսոնի հետ հարցազրույցում խիստ քննադատության է ենթարկել Իրանի դեմ սկսված պատերազմը։ Քենթը պնդել է, որ Թեհրանի կողմից ԱՄՆ-ի վրա հարձակման վերաբերյալ որևէ հավաստի հետախուզական տվյալ չի եղել։

Ըստ Քենթի՝ որոշումը կայացվել է ոչ թե ռազմավարական անհրաժեշտությունից, այլ արտաքին ճնշումների ներքո։ Նա մասնավորապես նշել է. «Իրանը մեր ազգի համար որևէ անմիջական սպառնալիք չէր ներկայացնում։ Ակնհայտ է, որ մենք սկսել ենք այս պատերազմը Իսրայելի և նրա հզոր ամերիկյան լոբբիի ճնշման պատճառով»։

Նախկին պաշտոնյան նաև հավելել է, որ Սպիտակ տանը բանավեճերը սահմանափակ են եղել, և շատ փորձագետների պարզապես թույլ չեն տվել նախագահին ներկայացնել իրական պատկերը։ «Այս վերջին տարբերակին նախորդող ժամանակահատվածում հիմնական որոշում կայացնողների մեծ մասին թույլ չի տրվել գալ և իրենց կարծիքը հայտնել նախագահին», - ասել է Քենթը, նշելով, որ անցյալ տարի Իրանի միջուկային օբյեկտներին ԱՄՆ-ի հարվածներից առաջ լուրջ բանավեճ է եղել։