ԵՄ-ն պետք է հրաժարվի միաձայնության սկզբունքից որոշակի որոշումներ ընդունելիս. Ռոբ Ետեն

Ուկրաինային 90 միլիարդ եվրո վարկ տրամադրելու որոշման հանդեպ վերջին րոպեին Հունգարիայի վետոն ընդգծում է, որ Եվրամիությունը պետք է հրաժարվի միաձայնությունից մի շարք որոշումներ ընդունելիս: Նիդերլանդների նորընտիր վարչապետ Ռոբ Ետենը այդ հայտարարությունն արել է որպես կառավարության ղեկավար՝ Բրյուսել կատարած իր առաջին այցի ժամանակ։

Ըստ վարչապետի՝ այդ օրինակը ցույց է տալիս նման մոտեցման անհրաժեշտությունը: «Մենք չենք կարողանում բացատրել մեր ընտրողներին, թե ինչու է Եվրոպան երբեմն չափազանց դանդաղ արձագանքում կարևոր հարցերին, որոնք վերաբերում են մեզ բոլորիս»,- հավելել է նա։

Նոր կոալիցիոն ծրագրում Նիդերլանդները կոչ է անում «պարզեցնել» 7-րդ հոդվածի ընթացակարգը, որն անդամ պետություններին կարող է զրկել քվեարկության իրավունքից՝ օրենքի գերակայության լուրջ խախտումների դեպքում։ Ռոբ Ետենի համոզմամբ՝ բավարար քաղաքական կամք չի եղել՝ Հունգարիայի նկատմամբ այդ հոդվածը կիրառելու համար:

«Քանի որ ԱՄՆ-ի աջակցությունն Ուկրաինային՝ փողի և զենքի առումով, նվազում է, եվրոպացիները պետք է աջակցեն Ուկրաինային՝ շարունակելու իր պայքարը ռուսական ագրեսիայի դեմ»,- ասել է Ետենը:

Օրբանի վետոն կապված է «Դրուժբա» խողովակաշարով ռուսական նավթի մատակարարումների դադարեցման հետ, որը, ըստ Կիևի, հունվարի 27-ին ռուսական անօդաչու թռչող սարքերի հարձակման է ենթարկվել և այդ ժամանակվանից ի վեր չի գործում։

Հունգարիայի վարչապետը պնդել է, որ Ուկրաինայի նախագահ Վոլոդիմիր Զելենսկին «քաղաքական պատճառներով» է դադարեցրել խողովակաշարի նորոգումը՝ Հունգարիայի առաջիկա ընտրության արդյունքի վրա ազդելու համար։