ԱՄՆ-ն Շրի Լանկայի ափերի մոտ միջազգային ջրերում իրանական ռազմանավ է խորտակել

ԱՄՆ զինված ուժերը Հնդկական օվկիանոսում` Շրի Լանկայի ափերի մոտ, խոցել են իրանական ռազմանավ, ճեպազրույցի ժամանակ հայտարարել է ԱՄՆ պաշտպանության նախարար Փիթ Հեգսեթը, գրում է BBC-ին։ Նրա խոսքով՝ ԱՄՆ-ն տորպեդոյով հարվածել է իրանական նավին միջազգային ջրերում։ «Իրանական ռազմանավը կարծել է, թե անվտանգ է միջազգային ջրերում, սակայն այն խորտակվել է տորպեդային հարվածից»,-նշել է նա։

Հեգսեթն ընդգծել է, որ սա Երկրորդ համաշխարհային պատերազմից հետո առաջին դեպքն է, երբ ամերիկյան սուզանավը տորպեդոյով հարվածել է թշնամու նավի։ «Ինչպես այդ պատերազմում, մենք պայքարում ենք հաղթանակի համար»,-հավելել է նա։ Պաշտպանության նախարարը չի մանրամասնել, թե կոնկրետ որ նավի մասին է խոսքը, սակայն Շրի Լանկայի ռազմածովային ուժերը հայտնել են, որ Հնդկական օվկիանոսում խորտակվել է իրանական IRIS Dena ռազմանավը։

Նավի վրա եղել է մոտ 140–180 մարդ։ Շրի Լանկայի պաշտպանության նախարարության ներկայացուցիչ, օդային փոխմարշալ Սամպաթ Թույակոնետան BBC-ին հայտնել է, որ արդեն հայտնաբերվել են առնվազն 80 զոհերի մարմիններ, իսկ զոհերի թիվը հետագայում հասել է 87-ի։

Շրի Լանկայի ռազմածովային ուժերը փրկել են 32 մարդու։ ԱՄՆ երեք պաշտոնյաներ նույնպես հաստատել են «Reuters»-ին, որ հարվածը հասցվել է ամերիկյան սուզանավից։ Սակայն Շրի Լանկայի ռազմածովային ուժերի խոսնակ Բուդհիկա Սամպաթը նշել է, որ խորտակման պատճառը դեռևս պաշտոնապես հաստատված չէ։ Նրա խոսքով՝ նավը աղետի ազդանշան է ուղարկել չորեքշաբթի առավոտյան՝ Շրի Լանկայի հարավում գտնվող Գալլե քաղաքից մոտ 40 ծովային մղոն հեռավորության վրա։ Փրկարարական գործողությունների ընթացքում ջրում նկատվել են նավթի հետքեր և փրկարարական նավակներ։

IRIS Dena-ն Իրանի Իսլամական Հանրապետության ռազմածովային ուժերի «Մաուջ» դասի ֆրեգատ է, որի ջրատարողությունը մոտ 1500 տոննա է, երկարությունը՝ 94 մետր, իսկ առավելագույն արագությունը՝ մոտ 30 հանգույց։

ԱՄՆ կենտրոնական հրամանատարությունն ավելի ուշ հայտարարել է, որ «ԱՄՆ զինված ուժերը հարվածել կամ խորտակել են իրանական ռեժիմի ավելի քան 20 նավ»։